កងទ័ពជើងទឹកអាមេរិក មិនព្រមចាក់វ៉ាក់សាំង នឹងត្រូវបណ្តេញចេញពី ក្របខ័ណ្ឌ

កងទ័ពជើងទឹកអាមេរិករូបណា ដែលបដិសេធចាក់វ៉ាក់សាំងប្រឆាំងជំងឺកូវីដ-១៩ មុនថ្ងៃកំណត់ទី២៨ខែវិច្ឆិកា នឹងត្រូវបណ្តេញចេញពីក្របខ័ណ្ឌ។

កងទ័ពជើងទឹកអាមេរិកបាននិយាយក្នុងសេចក្តីថ្លែងការណ៍មួយថា “ដោយសារតែវ៉ាក់សាំងការពារជំងឺកូវីដ-១៩ ឥឡូវនេះ បានក្លាយជាកាតព្វកិច្ចសម្រាប់សមាជិកយោធាទាំងអស់នោះ កងទ័ពជើងទឹកសូមប្រកាសពីផែនការ ចាប់ផ្តើមដំណើរការ បណ្តេញអ្នកដែលបដិសេធចាក់វ៉ាក់សាំងចេញពីក្របខ័ណ្ឌ ដោយគ្មានការពន្យាពេលឬលើកលែងឡើយ”។

នេះគឺជាការបញ្ជាក់យ៉ាងច្បាស់ៗជាលើកដំបូង ដោយមន្ទីរបញ្ចកោណ អំពីអ្វីដែលនឹងកើតឡើងចំពោះសមាជិកយោធាដែលបដិសេធចាក់វ៉ាក់សាំង។

កងទ័ពជើងទឹកបាននិយាយថា ៩៨ភាគរយនៃសមាជិកសកម្ម ៣៥០,០០០ នាក់របស់ខ្លួន បានចាប់ផ្តើមឬបញ្ចប់ដំណើរការចាក់វ៉ាក់សាំងរួចទៅហើយ។

អ្នកនាំពាក្យមន្ទីរបញ្ចកោណលោក John Kirby បាននិយាយកាលពីថ្ងៃអង្គារថា ៩៦,៧%នៃបុគ្គលិកជិត ១.៤ លាននាក់ បានទទួលវ៉ាក់សាំងយ៉ាងហោចណាស់មួយដូស និង ៨៣,៧% បានទទួលពីរដូស។

យ៉ាងណាក្តី បើបូករួមទាំងយោធាបម្រុង មានត្រឹមតែ៨០ភាគរយប៉ុណ្ណោះ ដែលបានចាក់មួយដូស។

ប្រសិនបើស្ថាប័នយោធាទាំងអស់ចាត់វិធានការដូចកងទ័ពជើងទឹកដែរនោះ ពួកគេប្រឈមនឹងការបាត់បង់កងទ័ពរហូតដល់ទៅ ៤៦,០០០ នាក់។

ឧត្តមនាវីឯកលោក John Nowell ប្រធានបុគ្គលិកកងទ័ពជើងទឹកបាននិយាយថា មានកងទ័ពជើងទឹកចំនួន ១៦៤នាក់បានស្លាប់ដោយសារជំងឺកូវីដ-១៩ ចាប់តាំងពីរោគរាតត្បាតផ្ទុះឡើង។ ក្នុងចំណោមពួកគេ មាន ១៤៤នាក់ត្រូវបានគេដឹងថា មិនបានចាក់វ៉ាក់សាំង៕

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក សម្រេចចាក់វ៉ាក់សាំងដូសជំរុញ ដល់អ្នកមានប្រព័ន្ធភាពស៊ាំចុះខ្សោយ