វ៉ាក់សាំងកូវីដ-១៩ជួយឲ្យរាងកាយ ស្គាល់វីរុសបំប្លែងខ្លួនសាហាវៗ

ការសិក្សាថ្មីមួយបង្ហាញថា វ៉ាក់សាំងបង្ការកូវីដ-១៩ អាចបង្កើតកោសិកាចងចាំក្នុងសរីរាង្គដោយជួយឱ្យរាងកាយស្គាល់កូវីដបំប្លែងខ្លួនសាហាវៗ ព្រមទាំងជួយឱ្យសរីរាង្គអាចប្រយុទ្ធប្រឆាំងនឹងការផ្លាស់ប្ដូរនៃវីរុសបំប្លែងខ្លួនថ្មីៗផ្សេងទៀតផងដែរ។

ទិន្នន័យដែលបានបោះពុម្ពផ្សាយនៅក្នុងទស្សនាវដ្តីវេជ្ជសាស្ត្រ Immunity បង្ហាញថា វ៉ាក់សាំងប្រភេទ mRNA អាចបង្កើតកោសិកាចងចាំ B នៅក្នុងបុគ្គលដែលទទួលបានវ៉ាក់សាំងពេញលេញ។ កោសិកាទាំងនេះ ជាកោសិកាជួយសម្គាល់មេរោគឆ្លង និងបង្អាក់ការផ្លាស់ប្តូរនៃវីរុសនៅក្នុងសរីរាង្គ។

សម្រាប់មនុស្សដែលបានចាក់វ៉ាក់សាំងរួចរាល់ ទាំងអ្នកធ្លាប់និងមិនធ្លាប់ឆ្លងកូវីដ-១៩ វ៉ាក់សាំងនឹងជួយឱ្យរាងកាយមានការឆ្លើយតបខ្លាំងក្លាចំពោះវីរុសបំប្លែងខ្លួនសាហាវៗគ្រប់ប្រភេទ។  មិនតែប៉ុណ្ណោះវ៉ាក់សាំងនឹងបន្ស៊ាំប្រព័ន្ធភាពស៊ាំឱ្យស្គាល់វីរុសបំប្លែងខ្លួន និងបង្រៀនពីរបៀបទប់ទល់នឹងវីរុសថ្មីៗថែមទៀត។ ទោះយ៉ាងណាមិញ បុគ្គលដែលមិនធ្លាប់ឆ្លងកូវីដ-១៩ មានការឆ្លើយតបយឺតចំពោះវីរុសបំប្លែងផ្សេងៗ ពោលគឺប្រព័ន្ធភាពស៊ាំខ្សោយជាងអ្នកធ្លាប់វិជ្ជមានកូវីដ-១៩។

វេជ្ជបណ្ឌិត Anthony Fauci នាយកវិទ្យាស្ថានជាតិអាឡ័កស៊ី និងជំងឺឆ្លងអាមេរិក (NIAID) បានប្រាប់ Bloomberg កាលពីសប្តាហ៍មុនថា វីរុសបំប្លែងខ្លួនគ្រប់ប្រភេទកំពុងធ្លាក់ចុះការរាលដាល ប៉ុន្តែវាអាចកើនឡើងម្ដងទៀត ក្នុងចំណោមអ្នកដែលមិនបានចាក់វ៉ាក់សាំង ហើយចុងក្រោយវាអាចបន្តចម្លងទៅកាន់អ្នកទទួលថ្នាំបង្ការកូវីដ-១៩រួលរាល់ផងដែរ។

ដូច្នេះហើយ ទើបវេជ្ជបណ្ឌិតរូបនេះ អំពាវនាវដល់សាធារណជនទៅចាក់វ៉ាក់សាំងឱ្យបានគ្រប់ៗគ្នា និងបន្តអនុវត្តនូវវិធានការសុខាភិបាលឱ្យបានខ្ជាប់ខ្ជួន៕

ប្រែសម្រួល៖ សន្យា

ប្រភព៖ DeseretNews

ចុចអាន៖ បង្ហាញទិន្នន័យ ប្រភេទវ៉ាក់សាំងដូសជំរុញ អាចការពារកូវីដ-១៩ បានល្អបំផុត

ចុចអាន៖ ទើបចាក់វ៉ាក់សាំង Sinovac ដូសជំរុញរួច បានធ្វើរឿងទាំង ៤នេះឬនៅ?