ទីបំផុត អាស៊ាន សម្រេចដកមេដឹកនាំ មីយ៉ាន់ម៉ា ចេញពីកិច្ចប្រជុំកំពូល

សមាគមប្រជាជាតិអាស៊ីអាគ្នេយ៍ (អាស៊ាន) កាលពីថ្ងៃសៅរ៍បាននិយាយថា ប្រមុខយោធាមីយ៉ាន់ម៉ាលោក Min Aung Hlain នឹងត្រូវបានដកចេញពីកិច្ចប្រជុំកំពូលនាថ្ងៃទី ២៦ ដល់ថ្ងៃទី ២៨ ខែតុលាខាងមុខនេះ ។

ដោយដកស្រង់សេចក្តីថ្លែងការណ៍របស់អាស៊ាន សារព័ត៌មាន AFP បានរាយការណ៍ថា “អាស៊ានបានសម្រេចចិត្តអញ្ជើញអ្នកតំណាងដែលមិនមាននិន្នាការនយោបាយមកពីប្រទេសមីយ៉ាន់ម៉ា ជំនួសលោក Min Aung Hlain បន្ទាប់ពីប្រទេសជាសមាជិកមួយចំនួនបានអំពាវនាវដល់មីយ៉ាន់ម៉ាឲ្យស្តារកិច្ចការផ្ទៃក្នុងរបស់ខ្លួន និងធ្វើឲ្យប្រទេសវិលត្រឡប់មករកភាពប្រក្រតីវិញ”” ។

ទន្ទឹមនោះវាបានកើតឡើង ក្រោយពេលដែលសមាគមប្រជាជាតិអាស៊ីអាគ្នេយ៍ (អាស៊ាន) បានយល់ព្រមលើការមូលមតិគ្នាចំនួន ៥ ចំណុចជាមួយលោក Min Aung Hlaing កាលពីខែមេសា ប៉ុន្តែសមាជិកមួយចំនួននៃប្លុកនេះ បានរិះគន់ការខកខានរបស់យោធា ក្នុងការអនុវត្តផែនការនេះ រួមបញ្ចូលទាំងការសន្ទនាគ្នាជាមួយគ្រប់ភាគី ការចូលទៅក្នុងប្រទេសក្នុងលក្ខខណ្ឌមនុស្សធម៌ និងការបញ្ចប់អរិភាពជាដើម ។

នេះមិនមែនជាលើកទីមួយទេដែលអាស៊ានបានសម្តែងការមិនសប្បាយចិត្ត និងព្រួយបារម្ភចំពោះការប្តេជ្ញាចិត្តរបស់មីយ៉ាន់ម៉ាចំពោះកិច្ចព្រមព្រៀងនេះ ។ កន្លងមកនៅក្នុងឱកាសជាច្រើនផ្សេងទៀតអាស៊ានបានជំរុញឲ្យរបបយោធាបង្កើនកិច្ចសហប្រតិបត្តិការក្នុងការដោះស្រាយវិបត្តិនៅក្នុងប្រទេសនោះ ។

ស្របពេលជាមួយគ្នានេះ ភាពតានតឹងក៏កើនឡើង បន្ទាប់ពីរបបយោធាមីយ៉ាន់ម៉ាបានបដិសេធយ៉ាងដាច់អហង្ការនូវសំណើរបស់អាស៊ានដើម្បីអនុញ្ញាតឲ្យបេសកជនពិសេសប្រចាំតំបន់ជួបជាមួយគ្រប់ភាគីពាក់ព័ន្ធដើម្បីកម្ចាត់ស្ថានការណ៍នៅក្នុងប្រទេសដែលរួមបញ្ចូលទាំងមេដឹកនាំស៊ីវិលលោកស្រី អ៊ុងសាន ស៊ូជី ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Hindustan Times

ចុចអាន ៖ អាស៊ាន ពិភាក្សា ដកមេដឹកនាំមីយ៉ាន់ម៉ា ចេញពីកិច្ចប្រជុំកំពូល