អ៊ីរ៉ង់បដិសេធផែនការបោះបង់កិច្ចព្រមព្រៀងនុយក្លេអ៊ែរ និងអះអាងថា អាចនាំឲ្យមានសង្គ្រាមបើកចំហ

ប្រធានាធិបតីរបស់ប្រទេសអ៊ីរ៉ង់លោក Hassan Rouhani បានច្រានចោលនូវសំណើរបង្កមហន្តរាយមួយពីសភារបស់ប្រទេសដែលត្រូវបានគេចាត់ទុកថាជាការបញ្ចប់ការត្រួតពិនិត្យកម្មវិធីនុយក្លេអ៊ែរអន្តរជាតិជាបន្ទាន់ ។ អ៊ីរ៉ង់ត្រូវបានគេចោទប្រកាន់ជាយូរមកហើយពីបទស្វែងរកអាវុធនុយក្លេអ៊ែរ ទោះបីជាខ្លួនបដិសេធការអះអាងនេះក៏ដោយ ។

ភាពតានតឹងនៅក្នុងប្រទេសអ៊ីរ៉ង់បានកើនឡើងកាលពីថ្ងៃសុក្រ នៅពេលលោក Mohsen Fakhrizadeh ដែលជាអ្នកវិទ្យាសាស្ត្រនុយក្លេអ៊ែរជាន់ខ្ពស់អ៊ីរ៉ង់ត្រូវបានគេធ្វើឃាតនៅខាងក្រៅទីក្រុងតេអេរ៉ង់ពាក់ព័ន្ធនឹងក្រុមអ្នកវាយប្រហារជាច្រើននាក់ ។

បន្ទាប់ពីការសម្លាប់នេះ សភាអ៊ីរ៉ង់បានគាំទ្រសេចក្តីព្រាងច្បាប់មួយដែលអំពាវនាវឲ្យដកទណ្ឌកម្ម និងការការពារផលប្រយោជន៍របស់ប្រជាជនអ៊ីរ៉ង់ ។ ពួកគេបានអះអាងថា វានឹងសម្រេចគោលដៅជីវិតរបស់លោក Fakhrizadeh បន្ទាប់ពីគាត់ត្រូវបានគេធ្វើឃាត ។

ប្រសិនបើអ៊ីរ៉ង់រារាំងការត្រួតពិនិត្យនុយក្លេអ៊ែរនោះ វានឹងត្រូវបានមើលឃើញថាជាការបង្កហេតុយ៉ាងខ្លាំងដល់គណបក្សប្រឆាំងរបស់ប្រទេស ហើយអាចនាំឲ្យមានជម្លោះបើកចំហ ។ អ៊ីស្រាអែល និងអារ៉ាប៊ីសាអ៊ូឌីតបានទទូចម្តងហើយម្តងទៀតថា អ៊ីរ៉ង់មិនត្រូវបានអនុញ្ញាតឲ្យទទួលបានអាវុធបរមាណូទេ ។

សេចក្តីស្នើច្បាប់បានអំពាវនាវឲ្យអ៊ីរ៉ង់ផលិត និងរក្សាទុកសារធាតុអ៊ុយរ៉ានីញ៉ូម ១២០ គីឡូក្រាមក្នុងមួយឆ្នាំដែលចម្រាញ់បាន ២០ ភាគរយ ។ ទោះយ៉ាងណាសំណើនេះត្រូវបានច្រានចោលដោយរបបអ៊ីរ៉ង់ ។

ថ្លែងទៅកាន់សន្និសីទកាសែតកាលពីថ្ងៃអង្គារលោក Saeed Khatibzedeh អ្នកនាំពាក្យក្រសួងការបរទេសបាននិយាយថា “វាមិនចាំបាច់ និងមិនមានប្រយោជន៍ ។ រដ្ឋាភិបាលបានប្រកាសយ៉ាងច្បាស់ថាខ្លួនមិនយល់ស្របនឹងផែនការនេះនោះទេ” ៕

ប្រែសម្រួលដោយ ៖ ជីវ័ន្ត

ប្រភព ៖ Express