ទម្លាយទំហំទឹកប្រាក់ ដែល វៀតណាម ចំណាយដើម្បីប្រយុទ្ធប្រឆាំង កូវីដ

គណៈកម្មាធិការប្រយុទ្ធប្រឆាំងនឹងជំងឺកូវីដ-១៩ វៀតណាម បានរាយការណ៍ថា ប្រទេសនេះ បានចំណាយថវិកាជាង ៣០ ទ្រីលានដុង (១.៣២ ពាន់លានដុល្លារអាមេរិក) ពីកញ្ចប់ថវិការដ្ឋ ដើម្បីប្រយុទ្ធប្រឆាំងនឹងវីរុសកូរ៉ូណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ក្រសួងសុខាភិបាលទទួលបានប្រហែល ២១.២ ទ្រីលានដុង ដែលខ្លួនយកទៅប្រើដើម្បីទិញវ៉ាក់សាំង សាងសង់បន្ទប់ ICU និងព្យាបាលអ្នកជំងឺ។ ចំណែក ក្រសួងសន្តិសុខសាធារណៈទទួលបាន ១.៤ ទ្រីលានដុង ហើយក្រសួងការពារជាតិទទួលបាន ២.៧ ទ្រីលានដុង។

រីឯថវិកាចំនួន ៥.២ ទ្រីលានដុង ត្រូវបានចែកចាយទៅកាន់តំបន់ដែលស្ថានភាពរាតត្បាតមានភាពធ្ងន់ធ្ងររួមទាំងទីក្រុងហូជីមិញ ដុងណៃ ប៊ិញឌួងនិងហៃឌួង ផងដែរ ដែលទាំងនេះសុទ្ធតែជាមជ្ឈមណ្ឌលឧស្សាហកម្មធំៗរបស់ប្រទេស។

អង្ករចំនួន ១៣៧,០០០ តោនពីទុនបម្រុងជាតិ ត្រូវបានចែកចាយដល់តំបន់ចំនួន ៣១ ដើម្បីធានាសន្តិសុខស្បៀង ក្នុងអំឡុងពេលមានជំងឺរាតត្បាត។ អាជីវកម្មនិងអង្គការមួយចំនួន ទាំងក្នុងនិងក្រៅប្រទេសវៀតណាម និងរដ្ឋាភិបាលបរទេស ក៏បានផ្តល់នូវម៉ាស៊ីនជំនួយខ្យល់អុកស៊ីសែនរាប់ពាន់គ្រឿង ម៉ាស ឧបករណ៍ធ្វើតេស្ត ព្រមទាំងឧបករណ៍និងគ្រឿងបរិក្ខារផ្សេងទៀតជាច្រើនផងដែរ សម្រាប់ប្រយុទ្ធប្រឆាំងនឹងមេរោគកូវីដ។

បុគ្គលិកប្រហែល ៣០០,០០០ នាក់មកពីមន្ទីរពេទ្យ យោធានិងប៉ូលិស ត្រូវបានដាក់ពង្រាយទូទាំងប្រទេស។ ក្នុងចំណោមនោះ មានបុគ្គលិកសុខាភិបាលចំនួន២០,០០០នាក់ យោធា១៣៣,០០០នាក់និងកងកម្លាំងប៉ូលិស១២៦,០០០នាក់។

គណៈកម្មាធិការដឹកនាំ បាននិយាយថា ប្រទេសវៀតណាមបានឆ្លងកាត់រលកឆ្លងវីរុសកូវីដ-១៩ចំនួន ៤ ចាប់តាំងពីឆ្នាំមុនមក។

គិតត្រឹមពេលនេះ វៀតណាមមានអ្នកឆ្លងជាង ៨៦៧,០០០ នាក់និងស្លាប់ចំនួន ២១,២៦៩ នាក់៕

ប្រែសម្រួល៖ Vann Vann

ប្រភព៖ VN Express

ចុចអាន៖ មកស្គាល់ច្បាស់ អំពីវ៉ាក់សាំងកូវីដ Hayat-Vax ដែល វៀតណាម ទើបទទួលបាន