ថៃ ប្រកាស ឈប់ចាក់វ៉ាក់សាំង Sinovac

ប្រធាននាយកដ្ឋានប្រយុទ្ធប្រឆាំងជំងឺឆ្លងនិយាយថា ប្រទេសថៃ នឹងឈប់ប្រើវ៉ាក់សាំងកូវីដ Sinovac នៅពេលការផ្គត់ផ្គង់បច្ចុប្បន្ន អស់នៅចុងខែនេះ។

លោកវេជ្ជបណ្ឌិត Opas Karnkawinpong និយាយថា កម្មវិធីរបស់រដ្ឋាភិបាល នឹងប្តូរទៅចាក់វ៉ាក់សាំង AstraZeneca ជាដូសទី១ និង Pfizer ជាដូសទី២វិញ។

កាសែតបាងកកប៉ុស្តិ៍បានរាយការណ៍ថា ចាប់តាំងពីខែកុម្ភៈមក វ៉ាក់សាំង Sinovac របស់ប្រទេសចិនជាង ៣១.៥ លានដូស ត្រូវបានចាក់ជាដំបូងជូនបុគ្គលិកថែទាំសុខភាពនិងក្រុមដែលមានហានិភ័យខ្ពស់ ក៏ដូចជាប្រជាជននៅ ភូកេត ផងដែរ។

បន្ទាប់មក ក្រសួងសុខាភិបាលសាធារណៈ បានផ្លាស់ប្តូរទៅប្រើវ៉ាក់សាំង Sinovac ជាដូសដំបូងនិងវ៉ាក់សាំង AstraZeneca ជាដូសទី២វិញ។

ថៃ គឺជាប្រទេសដំបូងគេនៅលើពិភពលោក ដែលបានអនុម័តវិធីសាស្រ្តចាក់វ៉ាក់សាំងលាយគ្នា ខណៈមន្ត្រីបានលើកឡើង អំពីប្រសិទ្ធភាពដ៏ល្អរបស់វិធីសាស្រ្តនេះ។

យោងតាមរបាយការណ៍របស់បាងកកប៉ុស្តិ៍បានបង្ហាញថា ចាប់ពីឆ្នាំក្រោយទៅ ប្រទេសថៃនឹងទិញវ៉ាក់សាំងការពារជំងឺកូវីដ-១៩ ចំនួន១២០លានដូស រួមទាំងប្រភេទ AstraZeneca ដែលផលិតក្នុងស្រុកចំនួន៦០លានដូសផងដែរ។

ក្រសួងសុខាភិបាលអះអាងថា ប្រទេសនេះនឹងទិញតែវ៉ាក់សាំងណា ដែលមានប្រសិទ្ធិភាពច្បាស់លាស់ចំពោះវីរុសបំប្លែងខ្លួនថ្មីៗប៉ុណ្ណោះ៕

ប្រែសម្រួល៖ Vann Vann

ប្រភព៖ Thaiger

ចុចអាន៖ អ្នកចាក់ Sinovac ២ដូស រួចចាក់ AstraZeneca ជាដូសជំរុញ នឹងជួបប្រទះផលរំខានទាំងនេះ