ព័ត៌មានអន្ដរជាតិ

នៅ UN ស្ត្រីអាហ្វហ្គានីស្ថានមួយក្រុមអំពាវនាវមិនឲ្យតាលីបង់មានអាសនៈ

បានផុស

៣ years មុន

នៅ

ថ្ងៃសុក្រ ២២ តុលា ២០២១

ដោយ

ស្ត្រីអាហ្វហ្គានីស្ថានមួយក្រុមបានជំរុញឲ្យអង្គការសហប្រជាជាតិ (UN) បិទមិនឲ្យតាលីបង់មានអាសនៈឡើយ ដោយបានអំពាវនាវឲ្យមានតំណាងកាន់តែប្រសើរសម្រាប់ប្រទេសរបស់ពួកគេកំឡុងពេលដំណើរទស្សនកិច្ចមួយទៅកាន់ទីស្នាក់ការរបស់ UN នៅទីក្រុងញ៉ូវយ៉ក សហរដ្ឋអាមេរិក នាថ្ងៃព្រហស្បតិ៍ ទី២១ ខែតុលា។

ស្ត្រីអាហ្វហ្គានីស្ថានដែលជាអតីតអ្នកនយោបាយ និងជាអ្នកចរចាសន្តិភាព អ្នកស្រី Fawzia Koofi បានប្រាប់អ្នកសារព័ត៌មាននៅខាងក្រៅក្រុមប្រឹក្សាសន្តិសុខអង្គការសហប្រជាជាតិនៅក្រុងញ៉ូវយ៉កថា ៖«វាសាមញ្ញណាស់។ UN ត្រូវការផ្តល់អាសនៈនោះទៅនរណាម្នាក់ដែលគោរពសិទ្ធិមនុស្សគ្រប់គ្នានៅអាហ្វហ្គានីស្ថាន»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រីនិយាយពីស្ត្រីអាហ្វហ្គានីស្ថានថា ៖«យើងបាននិយាយច្រើនណាស់មកហើយ តែគេមិនស្តាប់យើងទេ។ ជំនួយ លុយ ការទទួលស្គាល់ ទាំងអស់នេះសុទ្ធតែអានុភាពដែលពិភពលោកគួរប្រើសម្រាប់ការដាក់បញ្ចូល សម្រាប់ការគោរពសិទ្ធិស្ត្រី សម្រាប់ការគោរពសិទ្ធិអ្នករាល់គ្នា»។

ចូលរួមជាមួយអ្នកស្រី Koofi ក្នុងការអំពាវនាវនេះ មានអតីតអ្នកនយោបាយអ្នកស្រី Naheed Fareed, អតីតការទូតអ្នកស្រី Asila Wardak និងអតីតអ្នកសារព័ត៌មានអ្នកស្រី Anisa Shaheed។

«នៅពេលតាលីបង់កាន់កាប់អាហ្វហ្គានីស្ថាន ពួកគេនិយាយថា ពួកគេនឹងអនុញ្ញាតឲ្យស្ត្រីបន្តទៅធ្វើការ ទៅសាលារៀន តែពួកគេមិនបានគោរពពាក្យសន្យាទេ»។ អ្នកស្រីបានបញ្ជាក់។

ចាប់តាំងពីក្តោបអំណាចកាលពីពាក់កណ្តាលខែសីហាមក មេដឹកនាំតាលីបង់បានប្តេជ្ញាគោរពសិទ្ធិស្ត្រីដោយអនុលោមតាមច្បាប់ឥស្លាម ឬ sharia។ ប៉ុន្តែស្ថិតក្រោមការគ្រប់គ្រងរបស់តាលីបង់លើកមុនពីឆ្នាំ១៩៩៦ដល់២០០១ ស្ត្រីមិនអាចទៅធ្វើការបានទេ ហើយក្មេងស្រីហាមទៅរៀនដែរ។ ស្ត្រីត្រូវស្លៀកពាក់ជិតខ្លួនតាំងពីក្បាលរហូតដល់ចុងជើង ហើយរាល់ពេលចេញក្រៅត្រូវមានសាច់ញាតិជាបុរសទៅជាមួយ៕

ប្រែសម្រួល៖ វីរបុត្រ
ប្រភព៖ Reuters