ព័ត៌មានអន្ដរជាតិ

មិនខុសពី ថៃ រមណីយដ្ឋានកោះ វៀតណាម ចម្ងាយ ១០ គីឡូម៉ែត្រពីឆ្នេរសមុទ្រ កម្ពុជា ត្រៀមបើកខែក្រោយ

បានផុស

៣ years មុន

នៅ

ថ្ងៃសៅរ៍ ២៣ តុលា ២០២១

ដោយ

អាជ្ញាធរវៀតណាមបាននិយាយថា ប្រទេសវៀតណាមគ្រោងនឹងបើកកោះឆ្នេរខ្សាច់ Phu Quoc ឡើងវិញដល់ភ្ញៀវទេសចរបរទេស នៅចុងខែវិច្ឆិកា ខណៈប្រទេសនេះកំពុងរកវិធីដើម្បីស្តារសេដ្ឋកិច្ច ដែលទទួលរងពីការជាប់គាំង ដោយសារការរីករាលដាលនៃជំងឺកូវីដ ១៩ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា កោះ Phu Quoc ស្ថិតនៅចម្ងាយប្រហែល ១០ គីឡូម៉ែត្រពីប្រទេសកម្ពុជា និងមានឆ្នេរខ្សាច់ស អមជាមួយទឹកថ្លា ព្រមទាំងភ្នំ និងព្រៃក្រាស់។ កោះនេះបានទាក់ទាញអ្នកទស្សនាប្រមាណ ៦៧០,០០០ នាក់ និងទទួលបានចំណូលជាង ១៨ ពាន់លានដុល្លារ ពីការមកដល់របស់ភ្ញៀវអន្តរជាតិនៅឆ្នាំ ២០១៩ ដោយអាជ្ញាធរសង្ឃឹមថា នឹងប្រែក្លាយវាទៅជាតំបន់ទេសចរណ៍មេកា ក្នុងរចនាបថដូចភូកេតរបស់ថៃ ឬកោះបាលីរបស់ឥណ្ឌូនេស៊ីដែរ។

រដ្ឋាភិបាលក៏បាននិយាយ កាលពីល្ងាចថ្ងៃសុក្រថា“ ជើងហោះហើរជួល” សម្រាប់អ្នកដំណើរអន្តរជាតិដែលមានលិខិតឆ្លងដែនវ៉ាក់សាំង នឹងត្រូវបានស្វាគមន៍មកកាន់កោះនេះ។

បន្ទាប់ពីនោះ នៅចន្លោះចុងខែធ្នូនិងចុងខែមីនា កោះនេះមានបំណងទទួលបានភ្ញៀវបរទេសរហូតដល់ ៥០០០ នាក់ តាមជើងហោះហើរជួលស្រដៀងគ្នា។ អ្នកទេសចរនឹងត្រូវបង្ហាញបណ្ណចាក់វ៉ាក់សាំង រួមជាមួយលទ្ធផលតេស្តអវិជ្ជមានកូវីដ មុនពេលអនុញ្ញាតឲ្យចូល។

ការប្រកាសនេះធ្វើឡើង បន្ទាប់ពីថៃបាននិយាយថា អ្នកទេសចរដែលបានចាក់វ៉ាក់សាំងពីប្រទេសជាង ៤០ នឹងត្រូវបានអនុញ្ញាតឲ្យចូលមក ដោយមិនមានការដាក់ឲ្យនៅដាច់ពីគេចាប់ពីថ្ងៃទី ១ ខែវិច្ឆិកា។

គួររំលឹកដែរថា ផែនការពីមុនដើម្បីបើកកោះ Phu Quoc របស់វៀតណាម ដល់ភ្ញៀវអន្តរជាតិកាលពីខែតុលា ត្រូវបានលុបចោលដោយសារអត្រាចាក់វ៉ាក់សាំងទាប ក្នុងចំណោមប្រជាជន។ ប៉ុន្តែប្រទេសអាស៊ីអាគ្នេយ៍មួយនេះ អស់សង្ឃឹមក្នុងការស្តារសេដ្ឋកិច្ចរបស់ខ្លួនឡើងវិញ បន្ទាប់ពីមានការបិទប្រទេសជាច្រើនខែ ដោយសារការរាតត្បាតនៃមេរោគឆ្លងកូវីដ ១៩៕

ប្រែសម្រួល៖ សាង ស្រីល័ក្ខ

ប្រភព៖CNA

ចុចអាន៖វៀតណាម ត្រៀមបើករមណីយដ្ឋានកោះចម្ងាយ ១០ គីឡូម៉ែត្រពីឆ្នេរសមុទ្រ កម្ពុជា ឡើងវិញដល់ភ្ញៀវទេសចរបរទេស