ចិន ឆ្លើយតបទៅអាមេរិក ទាំងកំហឹង ក្រោយលោក បៃដិន​ ប្រកាស ការពារកោះតៃវ៉ាន់

ប្រទេសចិន បានឆ្លើយតបដោយកំហឹងចំពោះសហរដ្ឋអាមេរិក បន្ទាប់ពីលោកប្រធានាធិបតី ចូ បៃដិន បានអះអាងថា ទីក្រុងវ៉ាស៊ីនតោន នឹងការពារកោះតៃវ៉ាន់ ប្រសិនបើរងការវាយប្រហារដោយប្រទេសចិន ដែលបង្កឲ្យមានការភ័យខ្លាចផ្ទុះសង្គ្រាមលោកលើកទី៣។

ឆ្លើយតបទៅនឹងការអត្ថាធិប្បាយរបស់លោក បៃដិន, អ្នកនាំពាក្យក្រសួងការបរទេសចិន លោក Wang Wenbin បាននិយាយថា គ្មានផ្លូវដែលប្រទេសចិន ត្រូវសម្របសម្រួលលើបញ្ហាកោះតៃវ៉ាន់នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា “នៅពេលនិយាយអំពីបញ្ហាទាក់ទងនឹងអធិបតេយ្យភាពនិងបូរណភាពទឹកដីរបស់ចិននិងផលប្រយោជន៍ស្នូលផ្សេងទៀត គ្មានកន្លែងសម្រាប់ចិនក្នុងការសម្របសម្រួលឬធ្វើសម្បទានឡើយ។

គ្មាននរណាម្នាក់អាចមើលស្រាលការប្តេជ្ញាចិត្តដ៏មុតមាំ និងសមត្ថភាពដ៏រឹងមាំរបស់ប្រជាជនចិន ក្នុងការការពារអធិបតេយ្យភាពជាតិ និងបូរណភាពទឹកដីបានទេ។ កោះតៃវ៉ាន់គឺជាផ្នែកមួយដែលមិនអាចកាត់ផ្តាច់បាននៃទឹកដីរបស់ចិន។ បញ្ហា​តៃវ៉ាន់​ គឺ​ជា​កិច្ចការ​ផ្ទៃក្នុង​របស់​ចិន​សុទ្ធសាធ ដែល​មិន​អនុញ្ញាត​ឲ្យ​មាន​ការ​ធ្វើ​អន្តរាគមន៍​ពី​បរទេសឡើយ។

ការអត្ថាធិប្បាយរបស់ប្រធានាធិបតីសហរដ្ឋអាមេរិក គឺជាលើកទីពីរហើយ ចាប់តាំងពីខែសីហាមក ដែលកាលនោះ លោកបានព្រមានអំពីការដែលអាមេរិកទៅជួយតៃវ៉ាន់ ក្នុងករណីមានការវាយប្រហារពីចិន។

ក្នុងកម្មវិធី CNN town hall កាលពីយប់ថ្ងៃព្រហស្បតិ៍ ពិធីករ CNN លោក Anderson Cooper បានសួរទៅលោក បៃដិន ថា “តើអ្នកកំពុងនិយាយថាអាមេរិកនឹងការពារតៃវ៉ាន់ ប្រសិនបើចិនវាយប្រហារមែនទេ?”។ ពេលនោះលោកប្រធានាធិបតីបានឆ្លើយតបថា “មែនហើយ យើងមានការប្តេជ្ញាចិត្តក្នុងការធ្វើដូច្នេះ”។

ស្របពេលជាមួយគ្នានោះដែរ ទស្សនិកជនម្នាក់បានសួរទៅលោក Biden អំពីការធ្វើតេស្តមីស៊ីលលឿនជាងសំឡេងរបស់ចិននាពេលថ្មីៗនេះ ហើយបានសួរទៅលោកថា តើសហរដ្ឋអាមេរិកនឹងប្រឆាំងចិនដែរឬក៏អត់?

លោក បៃដិន បានឆ្លើយតបថា កុំព្រួយបារម្ភអំពីថាតើអាវុធទាំងនោះមានកម្លាំងខ្លាំងប៉ុនណា សហរដ្ឋអាមេរិកមានយោធាខ្លាំងបំផុតនៅលើពិភពលោក៕

ប្រែសម្រួល៖ Vann Vann

ប្រភព៖ Daily Star

ចុចអាន៖ បៃដិន ប្រកាសក្តែងៗ អាមេរិក នឹងការពារតៃវ៉ាន់ បើ ចិន វាយប្រហារ