ចិន យកវ៉ាក់សាំងកូវីដមកពីក្រុមហ៊ុនចំនួន ២ ចាក់កុមារអាយុ ៣ ទៅ ១១ ឆ្នាំ

ប្រទេសចិនបានចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ ១៩ នៅទូទាំងប្រទេស សម្រាប់កុមារដែលមានអាយុពី ៣ ទៅ ១១ ឆ្នាំ ក្នុងគោលបំណងបង្កើន និងពន្លឿនការកសាងភាពស៊ាំក្នុងសហគមន៍ ខណៈការផ្ទុះឡើងវិញនៃករណីឆ្លងថ្មីបានវាយប្រហារស្ទើរតែមួយភាគបីនៃប្រទេស ហើយអាក្រក់បំផុត ចាប់តាំងពីការផ្ទុះឡើងលើកដំបូងក្នុងឆ្នាំ ២០២០ ។

យោងតាមគេហទំព័រផ្លូវការរបស់គណៈកម្មការសុខាភិបាលខេត្តបានឲ្យដឹងថា តំបន់មួយចំនួនបានចាប់ផ្តើមយុទ្ធនាការនេះក្នុងរយៈពេលមួយសប្តាហ៍ ក្នុងនោះរួមមានខេត្ត Hubei, ខេត្ត Hunan, ខេត្ត Hainan និងខេត្ត Zhejiang ខណៈខេត្ត Fujian និងខេត្ត Anhui ភាគខាងកើតប្រទេសចិន ក៏បានប្រកាសពីផែនការចាក់វ៉ាក់សាំងដល់កុមារនៅថ្ងៃខាងមុខផងដែរ ។

យោងតាមការជូនដំណឹង ដែលចេញដោយគណៈកម្មការសុខាភិបាលខេត្ត បានឲ្យដឹងថា កុមារនៃក្រុមអាយុនេះនឹងទទួលការចាក់វ៉ាក់សាំងចំនួន ២ ដូសដែលផលិតដោយក្រុមហ៊ុន Sinopharm និង Sinovac របស់ប្រទេសចិន ក្នុងគម្លាតយ៉ាងតិច ៣ សប្តាហ៍ ។

ទន្ទឹមនោះ លោក Tao Lina អ្នកជំនាញខាងវ៉ាក់សាំងដែលមានមូលដ្ឋាននៅទីក្រុងសៀងហៃ បានប្រាប់សារព័ត៌មាន Global Times កាលពីថ្ងៃអង្គារថា កុមារត្រូវបានណែនាំ ជាពិសេសឲ្យចាក់វ៉ាក់សាំងការពារកូវីដ ព្រោះពួកគេមានទំនោរក្លាយជាប្រភពឆ្លងជាចង្កោមថ្មីនៅក្នុងគ្រួសារ ។

លោកបាននិយាយថា លើសពីនេះ ការឆ្លងជំងឺរាតត្បាតងាយនឹងកើតមាននៅក្នុងសាលារៀន ដែលមានមនុស្សច្រើន ដែលមានន័យថា កុមារត្រូវបានប៉ះពាល់នឹងកន្លែងដែលមានហានិភ័យនៃការឆ្លងខ្ពស់ ។

គួរបញ្ជាក់ថា មុនឈានដល់ការចាក់វ៉ាក់សាំងដល់ក្រុមកុមារអាយុនេះ ប្រទេសចិនក៏បានបើកយុទ្ធនាការចាក់វ៉ាក់សាំងដល់អ្នកដែលមានអាយុពី ១២ ដល់ ១៧ ឆ្នាំផងដែរកាលពីខែកក្កដា ក្នុងនោះលើសពី ៩១ ភាគរយបានបញ្ចប់ការចាក់ពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ Global Times

ចុចអាន ៖ វីរុសបំប្លែងខ្លួនក្លាយពូជមិនមែនឆ្លងលឿនជាង Delta ត្រឹម ១០ ភាគរយទេ