អ្នកវិទ្យាសាស្រ្តរកឃើញវីរុសកូវីដបំប្លែងខ្លួន គ្រោះថ្នាក់ មិនខ្លាចវ៉ាក់សាំង

អ្នកវិទ្យាសាស្ត្រនៅប្រទេសអាល្លឺម៉ង់ បានព្រមាននៅក្នុងការសិក្សាថ្មីមួយថា វីរុសកូវីដ-១៩បំប្លែងខ្លួនមួយប្រភេទ អាចយកឈ្នះវ៉ាក់សាំង ហើយនឹងបង្កជាគ្រោះថ្នាក់ ប្រសិនបើវីរុសនេះ លេចឡើងជាថ្មីម្តងទៀត។

នៅក្នុងទស្សនាវដ្តី Newsweek ក្រុមអ្នកវិទ្យាសាស្ត្របាននិយាយថា វីរុសបំប្លែងខ្លួន A.30 អាចយកឈ្នះវ៉ាក់សាំង Pfizer និង AstraZeneca។ ប៉ុន្តែ វីរុសបំប្លែងខ្លួននេះ មិនត្រូវបានគេមើលឃើញអស់រយៈពេលជាច្រើនខែមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ វីរុសប្រភេទ A.30 ត្រូវបានគេឃើញចុងក្រោយបំផុត កាលពីខែឧសភា និងខែមិថុនាឆ្នាំ២០២១។

ទិន្នន័យពី GISAID បានបង្ហាញពីករណីវីរុស A.30 ចំនួន៥ករណី នៅទូទាំងពិភពលោក។ ក្នុងនោះមាន ៣ករណីនៅប្រទេសអង់ហ្គោឡា មួយករណីនៅស៊ុយអែត និងមួយករណីទៀតនៅចក្រភពអង់គ្លេស។

អ្នកវិទ្យាសាស្ត្រនៅប្រទេសអាល្លឺម៉ង់បាននិយាយថា វីរុសប្រភេទ A.30 ទាមទារឲ្យមានការត្រួតពិនិត្យយ៉ាងជិតស្និទ្ធ និងរៀបចំវិធានការតបតឲ្យបានឆាប់រហ័សបំផុត ថ្វីបើវាមិនរីករាលដាលទូលំទូលាយក៏ដោយ។

ទោះជាយ៉ាងណាក៏ដោយ បច្ចុប្បន្ន ក្រុមអ្នកជំនាញបាននិងកំពុងតាមដានយ៉ាងយកចិត្តទុកដាក់ លើវីរុសបំប្លែងខ្លួនក្លាយពូជពី Delta ឈ្មោះ AY.4.2 ដែលកំពុងរីករាលដាលនៅក្នុងប្រទេសអង់គ្លេស៕

ប្រែសម្រួល៖ Vann Vann

ប្រភព៖ Deseret

ចុចអាន៖ ទោះចាក់វ៉ាក់សាំង២ដូស អ្នកនៅតែអាចចម្លងកូវីដទៅគ្រួសារ បានយ៉ាងងាយ