ទីក្រុងហូជីមិញ ស្នើបើកសាលារៀនឡើងវិញ សម្រាប់តែសិស្សថ្នាក់ទី ៩ និងទី ១២ ប៉ុណ្ណោះ

នាយកដ្ឋានអប់រំ និងបណ្តុះបណ្តាលទីក្រុងហូជីមិញ បាននាំយកផែនការបើកថ្នាក់រៀនឡើងវិញសម្រាប់សិស្សថ្នាក់ទី ៩ និងទី ១២ ចាប់ពីខែធ្នូ ខណៈទីក្រុងមួយនេះកំពុងបង្កើនយុទ្ធនាការចាក់វ៉ាក់សាំងកូវីដសម្រាប់កុមារក្នុងតំបន់ ។

យោងតាមសំណើរបស់លោក Nguyen Van Hieu ប្រធាននាយកដ្ឋានអប់រំបានឲ្យដឹងថា មានតែសិស្សថ្នាក់ទី ៩ និងទី ១២ ដែលត្រូវបានចាក់វ៉ាក់សាំងការពារជំងឺកូវីដ ១៩ ពេញដូសប៉ុណ្ណោះ នឹងត្រូវបានអនុញ្ញាតឲ្យត្រឡប់ទៅថ្នាក់រៀនវិញ ក្នុងរយៈពេល ២ ខែខាងមុខនេះ ។

សាលារៀននានានៅទូទាំងទីក្រុងហូជីមិញត្រូវបានបិទ ចាប់តាំងពីថ្ងៃទី ១០ ខែឧសភា សម្រាប់ការបង្ការ និងគ្រប់គ្រងជំងឺកូវីដ ១៩ ដោយសិស្សភាគច្រើនបានប្តូរទៅការរៀនតាមអនឡាញ ។

ស្របពេលជាមួយគ្នានេះ អាជ្ញាធរកំពុងប្រគល់សាលារៀនជាង ២៥០ ទីតាំងដែលត្រូវបានទាមទារសម្រាប់ការប្រើប្រាស់ជាកន្លែងធ្វើចត្តាឡីស័ក និងការព្យាបាលជំងឺកូវីដ ២៩ ទៅកាន់វិស័យអប់រំ ហើយការអនុវត្តផែនការត្រឡប់ទៅសាលារៀនវិញ ក៏នឹងតាមដានលើហានិភ័យនៃការចម្លងមេរោគនៅតាមសហគមន៍នីមួយៗផងដែរ ។

ទន្ទឹមនោះ លោក Hieu បាននិយាយថា សិស្សជិត ៤០,០០០ នាក់ដែលមានអាយុពី ១២ ទៅ ១៧ ឆ្នាំនៅក្នុងសង្កាត់ចំនួន ២១ នៃទីក្រុងហូជីមិញ និងទីក្រុង Thu Duc បានទទួលការចាក់វ៉ាក់សាំង Pfizer-BioNTech កាលពីថ្ងៃពុធ និងថ្ងៃព្រហស្បតិ៍ ។

បន្ថែមពីនេះ ទីក្រុងដែលមានប្រជាជនប្រហែល ៩ លាននាក់មួយនេះ បានចាក់វ៉ាក់សាំងជាង ១២.៩ លានដូសគិតត្រឹមថ្ងៃសុក្រ ជាមួយនឹងមនុស្សជាង ៥.៦ លាននាក់បានចាក់វ៉ាក់សាំងពេញដូស ។

គួររំឭកថា ទីក្រុងហូជីមិញគឺជាចំណុចផ្ទុះឆ្លងដ៏ធំបំផុតនៅក្នុងប្រទេស ចាប់តាំងពីការផ្ទុះឡើងលើកទី ៤ ដែលបានចាប់ផ្តើមនៅថ្ងៃទី ២៧ ខែមេសា ជាមួយនឹងករណីឆ្លងក្នុងសហគមន៍ជាង ៤២៩,០០០ ករណី ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ទេសចរបរទេសទៅលេង វៀតណាម ក៏មិនចាំបាច់ធ្វើចត្តាឡីស័កដែរ បើមានគ្រប់លក្ខខណ្ឌទាំងនេះ