តុងហ្គា ប្រឈមការបិទខ្ទប់ ទោះទើបរកឃើញអ្នកកើតកូវីដ ១ករណីដំបូង

នៅថ្ងៃសៅរ៍ទី៣០ ខែតុលានេះ ប្រជាជនតុងហ្គា បានប្រញាប់ប្រញាល់ធ្វើដំណើរទៅ មណ្ឌលចាក់វ៉ាក់សាំង បន្ទាប់ពីរដ្ឋាភិបាល ព្រមានថា កោះធំ Tongatapu អាចនឹងត្រូវបិទខ្ទប់នៅសប្តាហ៍ក្រោយ ក្រោយកត់ត្រាករណីឆ្លងជំងឺកូវីដ-១៩លើកដំបូង។

អ្នកឆ្លង គឺស្ថិតក្នុងចំណោមមនុស្ស ២១៥នាក់ នៅលើជើងហោះហើរមាតុភូមិនិវត្តន៍ មកពីទីក្រុង Christchurch នៃប្រទេសនូវែលសេឡង់។

នៅថ្ងៃសៅរ៍នេះ លោកនាយករដ្ឋមន្រ្តី Pohiva Tuionetoa បានព្រមានអ្នកកោះ ឲ្យត្រៀមខ្លួនសម្រាប់លទ្ធភាពនៃការបិទខ្ទប់ ប្រសិនបើករណីបន្ថែមទៀតលេចឡើង។

ព្រះរាជាណាចក្រប៉ាស៊ីហ្វិកដ៏តូចមួយនេះ ដែលមានចម្ងាយប្រហែល ១,៨០០គីឡូម៉ែត្រ ភាគឦសានប្រទេសនូវែលសេឡង់ គឺស្ថិតក្នុងចំណោមប្រទេសមួយក្តាប់តូចប៉ុណ្ណោះ ដែលអាចគេចផុតពីមេរោគឆ្លង ដែលបានប៉ះពាល់ដល់មនុស្សរាប់ពាន់លាននាក់នៅទូទាំងពិភពលោក និងបានឆក់យកជីវិតមនុស្សជិត៥លាននាក់។

គួរបញ្ជាក់ថា មានតែប្រហែលមួយភាគបីប៉ុណ្ណោះនៃប្រជាជនតុងហ្គាចំនួន ១០៦,០០០ នាក់ ដែលបានទទួលការចាក់វ៉ាក់សាំងកូវីដ ២ដូស៕

ប្រែសម្រួល៖ សន្យា

ប្រភព៖ CNA

ចុចអាន៖ ចិន កត់ត្រាករណីឆ្លងកូវីដក្នុងសហគមន៍ អាក្រក់បំផុតមិនធ្លាប់ជួបសោះ ៦សប្តាហ៍មកនេះ