នេះចម្លើយសារភាព អ្នកវាយប្រហារក្នុងរថភ្លើងក្រោមដី ក្រុងតូក្យូ

ប៉ូលិសក្រុងតូក្យូបាននិយាយថា បុរសម្នាក់ដែលត្រូវបានចាប់ខ្លួនពាក់ព័ន្ធនឹងការវាយប្រហារតាមរថភ្លើងកាលពីថ្ងៃអាទិត្យ នៅក្នុងរដ្ឋធានីរបស់ប្រទេសជប៉ុនបានប្រាប់ក្រុមអ្នកស៊ើបអង្កេតថា គាត់បានកំណត់គោលដៅរថភ្លើងនេះ ដោយសារតែវានេះនឹងមានហ្វូងមនុស្សច្រើនជិះទៅកាន់ពិធីបុណ្យ Halloween ។

បុរសឈ្មោះ Hattori Kyota អាយុ ២៤ ឆ្នាំដែលស្លៀកពាក់ពណ៌​ស្វាយ និង​ពណ៌​បៃតង​ខ្ចី ស្រដៀងនឹងតួអង្គ Joker ពីរឿងកំប្លែង Batman ត្រូវបានចោទប្រកាន់ថា បានចាក់អ្នកដំណើរអាយុ ៧២ ឆ្នាំម្នាក់ ដោយកាំបិតនៅលើរថភ្លើង Keio Line នៅជិតស្ថានីយ៍ Kokuryo នៅទីក្រុង Chofu ភាគខាងលិចទីក្រុងតូក្យូនៅម៉ោងប្រហែល ៨ នាទីយប់ ។

ប៉ូលិសនិយាយថា ក្រោយពេលចាក់រួច ជនសង្ស័យដែលកាន់កាំបិតបានរត់ចូលទៅក្នុងរថយន្តផ្សេងទៀត ខណៈមនុស្សកំពុងរត់គេចខ្លួន ។ ពួកគេ​និយាយ​ថា ​បន្ទាប់​មក​ជនសង្ស័យ​បាន​ប្រើហ្គាសដែកកេះ​ចាក់​ដុតនៅ​ក្នុងទូ​រថភ្លើង និងប្រាប់អាជ្ញាធរថា គាត់ចង់សម្លាប់មនុស្ស ។

ក្នុងហេតុការណ៍នោះ អ្នកដំណើរម្នាក់ក្នុងវ័យ ៧០ ឆ្នាំស្ថិតក្នុងស្ថានភាពធ្ងន់ធ្ងរ ខណៈមនុស្ស ១៦ នាក់ផ្សេងទៀតក៏បានរងរបួស និងត្រូវបានព្យាបាលផងដែរ ហើយភាគច្រើនដោយសារតែការស្រូបផ្សែង ។

ជាចុងក្រោយក្រុមអ្នកស៊ើបអង្កេតបាននិយាយថា ជនសង្ស័យឈ្មោះ Hattori បានប្រាប់ពួកគេថា គាត់មិនគិតថា អ្នកដំណើរផ្សេងទៀតនឹងអាចរត់ចេញបានទេ ព្រោះរថភ្លើងល្បឿនលឿនមានកំណត់ក្នុងការឈប់នៅស្ថានីយ៍ ។

គួរបញ្ជាក់ថា ឧក្រិដ្ឋកម្មហិង្សា គឺកម្រកើតមានណាស់នៅក្នុងប្រទេសជប៉ុន ប៉ុន្តែក្នុងប៉ុន្មានឆ្នាំថ្មីៗនេះ មានការវាយប្រហារដោយកាំបិតក្នុងកម្រិតខ្ពស់បំផុតជាច្រើន ។ កន្លងមក មនុស្ស ១០ នាក់បានរងរបួស ដោយសារបុរសកាន់កាំបិតម្នាក់វាយប្រហារនៅលើរថភ្លើងក្រុងតូក្យូមួយទៀតកាលពីខែសីហា ខណៈក្នុងឆ្នាំ ២០១៩ បុរសម្នាក់បានវាយប្រហារក្រុមសិស្សសាលា ដែលកំពុងរង់ចាំឡានក្រុងក្នុងទីក្រុង Kawasaki ដោយបានសម្លាប់មនុស្ស ២ នាក់ និងរងរបួសយ៉ាងហោចណាស់ ១៨ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ វីដេអូ អ្នកដំណើររត់ភ័យស្លន់ស្លោ លោតចេញពីបង្អួច ក្រោយការវាយប្រហារលើ រថភ្លើងក្រោមដី ក្រុងតូក្យូ