ចិន ប្រកាសឲ្យប្រជាជន ស្តុកទុកស្បៀងអាហារឲ្យហើយ

រដ្ឋាភិបាល​ចិន​ បាន​ប្រកាស​ឲ្យ​ក្រុម​គ្រួសារ ​ស្តុកទុក​ស្បៀងអាហារនិងសម្ភារ​ចាំបាច់ឲ្យហើយ ​ក្នុង​ករណី​មានគ្រោះ​អាសន្ន។

ទោះបីជាយ៉ាងណាក៏ដោយ មិនមានហេតុផលណាមួយត្រូវបានបញ្ជាក់ សម្រាប់ការជូនដំណឹងពីក្រសួងពាណិជ្ជកម្មនោះទេ ប៉ុន្តែវាកើតឡើងចំពេលមានការបិទខ្ទប់ជាបន្តដោយសារតែមេរោគកូវីដ-១៩ និងក្តីព្រួយបារម្ភអំពីការផ្គត់ផ្គង់បន្លែ បន្ទាប់ពីភ្លៀងធ្លាក់ខ្លាំងខុសពីធម្មតា បណ្តាលឲ្យដំណាំត្រូវខូចខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងក៏បានស្នើឲ្យអាជ្ញាធរមូលដ្ឋាន ត្រូវរក្សាខ្សែសង្វាក់ផ្គត់ផ្គង់ដំណើរឲ្យដោយរលូន ហើយតម្លៃត្រូវមានស្ថិរភាពផងដែរ។

យ៉ាងណាក្តី កាសែត The Economic Daily ដែលគាំទ្រដោយគណបក្សកុម្មុយនិស្តចិន បានជំរុញអ្នកអានរបស់ខ្លួន កុំឲ្យព្រួយបារម្ភ ដោយនិយាយថា ដំបូន្មានរបស់រដ្ឋាភិបាលមានគោលបំណងធ្វើឲ្យប្រាកដថា គ្រួសារនានាបានត្រៀមខ្លួនរួចរាល់ ប្រសិនបើការបិទខ្ទប់ត្រូវបានប្រកាសនៅក្នុងតំបន់របស់ពួកគេ។

ប៉ុន្តែកាសែត People’s Daily បានចុះផ្សាយថា ការជូនដំណឹងបែបនេះមិនមែនជារឿងធម្មតាឡើយ ប៉ុន្តែរឿងកើតឡើងពេលនេះ គឺដោយសារតែបញ្ហានានារួមទាំងការឡើងថ្លៃបន្លែ និងករណីកូវីដថ្មីៗផងដែរ។

តម្លៃម្ហូបអាហារតែងតែកើនឡើងនៅក្នុងប្រទេសចិន ខណៈរដូវរងាជិតមកដល់ ប៉ុន្តែតម្លៃបន្លែបានកើនឡើងក្នុងរយៈពេលប៉ុន្មានសប្តាហ៍ថ្មីៗនេះ ដោយសារតែអាកាសធាតុមិនអំណោយផល។

ទន្ទឹមនឹងនេះ ប្រទេសចិន នៅតែបន្តប្រើប្រាស់វិធានការបិទខ្ទប់យ៉ាងតឹងរ៉ឹង ដើម្បីទប់ទល់នឹងមេរោគឆ្លង។ ប្រទេស​ចិន​សង្ឃឹម​ថា ករណីឆ្លង​នឹង​ឈាន​ដល់​សូន្យ​ ​មុន​ពេល​ខ្លួន​ធ្វើ​ជា​ម្ចាស់​ផ្ទះ​ព្រឹត្តិការណ៍កីឡា​អូឡាំពិក​រដូវរងា​ដែល​នឹង​ចាប់​ផ្តើម​ក្នុង​ខែ​កុម្ភៈឆ្នាំក្រោយ៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក បៃដិន ថាឲ្យមេដឹកនាំចិន និងរុស្ស៊ីចំៗ ចំពោះការខកខាន កិច្ចប្រជុំកំពូលស្ដីពីអាកាសធាតុ