ព័ត៌មានអន្ដរជាតិ

ថ្ងៃនេះ តម្លៃប្រេងឡើងថ្លៃ បន្ទាប់ពីក្រុមហ៊ុន Aramco ឡើងថ្លៃលក់

បានផុស

៣ years មុន

នៅ

ថ្ងៃចន្ទ ៨ វិច្ឆិកា ២០២១

ដោយ

នៅថ្ងៃចន្ទនេះ តម្លៃប្រេងបានកើនឡើងជាថ្មី បន្ទាប់ពីក្រុមហ៊ុនផលិតប្រេងអារ៉ាប៊ីសាអូឌីត Aramco បានដំឡើងថ្លៃលក់ប្រេងឆៅរបស់ខ្លួនដែលបង្ហាញពីតម្រូវការនៅតែខ្លាំងក្នុងដំណាក់កាលផ្គត់ផ្គង់តឹងតែង។

ប្រេងឆៅបានកើនឡើង៩០សេន ឬ១.១%ក្នុងមួយបារ៉ែលតម្លៃ៨៣.៦៤ដុល្លារអាមេរិក បន្ទាប់ពីធ្លាក់ចុះជិត២%កាលពីសប្តាហ៍មុន។ ប្រេងអាមេរិកបានកើនឡើង៨៧សេន ឬ១.១%ក្នុងមួយបារ៉ែលតម្លៃ៨២.១៤ដុល្លារអាមេរិក បន្ទាប់ពីបានធ្លាក់ចុះស្ទើរ៣%រហូតដល់ថ្ងៃសុក្រមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Aramco កាលពីល្ងាចថ្ងៃសុក្របានដំឡើងថ្លៃលក់ជាផ្លូវការនៅខែធ្នូមកកាន់តំបន់អាស៊ីសម្រាប់ប្រេងឆៅស្រាលអារ៉ាប់ដល់២.៧០ដុល្លារក្នុងមួយបារ៉ែល ប្រៀបធៀបនឹងប្រេងឆៅអូម៉ង់/ឌូបៃដែលបានកើនឡើង១.៤០ដុល្លារចាប់ពីខែវិច្ឆិកានេះ។

ANZ Research បាននិយាយក្នុងកំណត់ហេតុមួយថា ការដំឡើងតម្លៃលក់របស់ក្រុមហ៊ុន Aramco បានបង្ហាញពីតម្រូវការនៅតែខ្លាំង ខណៈក្រុមផលិត OPEC និងក្រុមហ៊ុននាំចេញប្រេងធំៗផ្សេងទៀតរក្សាការផ្គត់ផ្គង់។

អង្គការនៃប្រទេសនាំចេញប្រេង និងសម្ព័ន្ធមិត្តដូចជា រុស្ស៊ីជាដើមដែលគេស្គាល់ថា OPEC+ បានឯកភាពគ្នាកាលពីសប្តាហ៍មុនដើម្បីប្រកាន់ខ្ជាប់នូវផែនការរបស់ខ្លួនក្នុងការផលិតទិន្នផលប្រេងចំនួន៤០ម៉ឺនបារ៉ែលក្នុងមួយថ្ងៃគិតចាប់ពីខែធ្នូ។

ប្រធានាធិបតីសហរដ្ឋអាមេរិក លោក ចូ បៃដិន បានអំពាវនាវឲ្យអង្គការ OPEC+ ផលិតចំនួនបារ៉ែលបន្ថែមទៀតដើម្បីកាត់បន្ថយការកើនឡើងតម្លៃ ហើយកាលពីថ្ងៃសៅរ៍និយាយថា រដ្ឋបាលរបស់លោកមានឧបករណ៍ផ្សេងទៀតដើម្បីដោះស្រាយបញ្ហាប្រេងឡើងថ្លៃ៕

ប្រែសម្រួល៖ វីរបុត្រ
ប្រភព៖ Reuters

Related Topics:តម្លៃប្រេង