រូបភាពលាត់ជើងខោ ឈរក្នុងទឹករបស់រដ្ឋមន្ត្រីការបរទេស ទូវ៉ាលូ ថ្លែងទៅកិច្ចប្រជុំ COP26 កំពុងល្បីខ្លាំង

រដ្ឋមន្ត្រីការបរទេសរបស់ប្រទេសទូវ៉ាលូបានថ្លែងសុន្ទរកថាទៅកាន់សន្និសីទអាកាសធាតុរបស់អង្គការសហប្រជាជាតិ (UN) នៅទីក្រុង Glasgow ប្រទេសស្កុតឡេន ដោយឈរនៅក្នុងទឹកសមុទ្រត្រឹមជង្គង់ ដើម្បីបង្ហាញពីរបៀបដែលប្រទេសកោះប៉ាស៊ីហ្វិកមួយនេះ ស្ថិតនៅជួរមុខនៃការប្រែប្រួលអាកាសធាតុ ។

រូបភាពរបស់លោក Simon Kofe ឈរក្នុងឯកសណ្ឋានក្រវ៉ាត់ក នៅពីក្រោយតុដែលដាក់ក្នុងទឹកសមុទ្រ ជាមួយនឹងការលាត់ជើងខោឡើងលើ ត្រូវបានចែករំលែកយ៉ាងទូលំទូលាយនៅលើប្រព័ន្ធផ្សព្វផ្សាយសង្គម ហើយបានទាក់ទាញចំណាប់អារម្មណ៍ចំពោះការតស៊ូរបស់ប្រទេសទូវ៉ាលូ ប្រឆាំងនឹងការកើនឡើងកម្រិតទឹកសមុទ្រ ។

លោក Kofe បាននិយាយនៅក្នុងសារជាវីដេអូរបស់គាត់ទៅកាន់សន្និសីទនោះថា “សេចក្តីថ្លែងការណ៍នេះរួមបញ្ចូលគ្នានូវការកំណត់កិច្ចប្រជុំ​កំពូល​ស្តីពី​អាកាសធាតុ COP26 ជាមួយនឹងស្ថានភាពជីវិតពិតដែលប្រឈមមុខក្នុងប្រទេសទូវ៉ាលូ ដោយសារតែផលប៉ះពាល់នៃការប្រែប្រួលអាកាសធាតុ និងការកើនឡើងកម្រិតទឹកសមុទ្រ ហើយបានគូសបញ្ជាក់អំពីសកម្មភាពដ៏ក្លាហានដែលប្រទេសទូវ៉ាលូកំពុងចាត់វិធានការ ដើម្បីដោះស្រាយបញ្ហាបន្ទាន់ក្រោមបម្រែបម្រួលអាកាសធាតុ” ។

មន្ត្រីរដ្ឋាភិបាលរូបនេះបាននិយាយថា វីដេអូនេះត្រូវបានថតដោយទូរទស្សន៍សាធារណៈ TVBC នៅចុងចុងកោះ Fongafale ដែលជាកូនកោះដ៏សំខាន់នៃរដ្ឋធានី Funafuti ។

សេចក្ដីថ្លែងការណ៍របស់លោក Kofe នឹងត្រូវបង្ហាញនៅក្នុងកិច្ចប្រជុំកំពូលអាកាសធាតុនៅថ្ងៃអង្គារ ហើយកើតឡើង នៅពេលដែលមេដឹកនាំក្នុងតំបន់ជំរុញឲ្យមានសកម្មភាពដ៏ខ្លាំងក្លាបន្ថែមទៀត ដើម្បីកំណត់ផលប៉ះពាល់នៃការប្រែប្រួលអាកាសធាតុ ។

អ្នកបំពុលធំ ៗ ជាច្រើនបានប្តេជ្ញាថានឹងបង្កើនការកាត់បន្ថយកាបូនរបស់ពួកគេក្នុងរយៈពេលប៉ុន្មានទសវត្សរ៍ខាងមុខនេះ ជាមួយនឹងគោលបំណងមួយចំនួនសម្រាប់ការបំភាយកាបូនសុទ្ធត្រឹមឆ្នាំ ២០៥០ ។

ប៉ុន្តែមេដឹកនាំកោះប៉ាស៊ីហ្វិកមួយនេះបានទាមទារឲ្យមានសកម្មភាពជាបន្ទាន់ ដោយចង្អុលបង្ហាញថា ការរស់រានមានជីវិតនៃបណ្តាប្រទេសទាបរបស់ពួកគេគឺកំពុងស្ថិតនៅក្នុងបញ្ហា ៕

ប្រែសម្រួលដោយ ៖ ជីវ័ន្ត

ប្រភព ៖ NDTV

ចុចអាន ៖ យន្តហោះឯកជនដឹកមេដឹកនាំ ទៅកាន់កិច្ចប្រជុំ COP26 នឹងបញ្ចេញឧស្ម័នកាបូនឌីអុកស៊ីត ១៣,០០០ តោន