ថៃ ព្រមាន ក្រុងបាងកក នឹងជួបសីតុណ្ហភាពចុះត្រជាក់បំផុតដល់ ១ អង្សាសេ

នាយកដ្ឋានឧតុនិយមថៃបានចេញសេចក្តីជូនដំណឹងថា អាកាសធាតុនៅតំបន់លើនៃប្រទេសថៃនឹងចុះត្រជាក់ខ្លាំងបំផុត ចាប់ពីថ្ងៃទី ៨ ដល់ថ្ងៃទី ១៣ ខែវិច្ឆិកា ពោលសីតុណ្ហភាពធ្លាក់ចុះដល់ ៣ ទៅ ៧ អង្សាសេ ។

ចំណែកតំបន់ភាគខាងជើង កណ្តាល ភាគខាងកើត រួមទាំងទីក្រុងបាងកក និងតំបន់ជុំវិញ សីតុណ្ហភាពនឹងធ្លាក់ចុះដល់ ៣ ទៅ ៥ អង្សាសេ ។

ទន្ទឹមនោះ រលកខ្យល់នៅឈូងសមុទ្រថៃ និងសមុទ្រ Andaman នឹងមានកម្លាំងខ្យល់ខ្លាំង ។ ចំណែក​ឈូង​សមុទ្រ​ថៃ រលកទឹកសមុទ្រនឹងមាន​កម្ពស់ ​២ ទៅ ៣ ​ម៉ែត្រ ខណៈរលក​សមុទ្រ ​ Andaman មាន​កម្ពស់ ​១ ទៅ ២ ​ម៉ែត្រ ។

សម្រាប់​ទីក្រុង​បាងកក និង​តំបន់​ជុំវិញ សីតុណ្ហភាព​ក្នុង​អំឡុង​ថ្ងៃ​ទី​ ៩ ដល់ថ្ងៃទី ១១ ខែវិច្ឆិកា ខាងមុខនេះ នឹង​ធ្លាក់​ចុះដល់ ​១ ទៅ ៣ ​អង្សា​សេ ​ជាមួយ​ខ្យល់​បក់​ខ្លាំង ខណៈដែលកន្លងមកសីតុណ្ហភាពអប្បបរមាជាទូទៅនៅក្នុងទីក្រុងមានរហូតដល់ពី ២១ ទៅ ២៣ អង្សាសេ និងអតិបរមាមានពី ២៩ ទៅ ៣១ អង្សាសេឯណោះ ។

ចំណែក​នៅ​តំបន់​ភាគ​ខាងជើង​វិញ នៅ​ថ្ងៃ​ទី ​៩ ដល់ថ្ងៃទី ១១ ខែវិច្ឆិកា សីតុណ្ហភាព​នឹង​ធ្លាក់​ចុះ ​២ ទៅ ៤​ អង្សា​សេ ជាមួយ​ខ្យល់​បក់ខ្លាំងផងដែរ ។ តំបន់ទាំងនោះកន្លងមក សីតុណ្ហភាពអប្បបរមាមានពី ១៨ ទៅ ២១ អង្សាសេ និងអតិបរមាមានពី ២៩ ទៅ ៣១ អង្សាសេឯណោះ ៕

ប្រែសម្រួលដោយ ៖ ជីវ័ន្ត

ប្រភព ៖ Sanook