ប្រជាជនពាក់កណ្តាលក្នុងពិភពលោកនឹងទទួលបានវ៉ាក់សាំង Sputnik V របស់រុស្ស៊ី

ប្រទេសយ៉ាងតិច៤០ដែលតំណាងឲ្យប្រជាជនជាងពាក់កណ្តាលនៃចំនួនប្រជាជនសរុបរបស់ពិភពលោកបានបង្ហាញចំណាប់អារម្មណ៍ចំពោះវ៉ាក់សាំងកូវីដរបស់រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទបង្ហាញមួយទៅកាន់អង្គការសហប្រជាជាតិកាលពីថ្ងៃព្រហស្បតិ៍ម្សិលមិញនេះ ក្រុមអ្នកវិទ្យាសាស្ត្រមកពីវិទ្យាស្ថាន Gamaleya ដែលបានបង្កើតរូបមន្តនេះបាននិយាយថា មានការកុម្ម៉ង់ទិញបឋមជាង១.២ពាន់លានដូស។ ការសាកល្បងពាក់ព័ន្ធនឹងមនុស្សចំនួន៤៥,០០០នាក់នៅទូទាំងពិភពលោកបានសន្និដ្ឋានថា ៩៥ភាគរយនៃអ្នកដែលត្រូវចាក់វ៉ាក់សាំង Sputnik V ចំនួន២ដូស បានអភិវឌ្ឍន៍ប្រព័ន្ធភាពស៊ាំចំពោះវីរុស។

កាលពីថ្ងៃពុធ ក្រុមអ្នកបង្កើតវ៉ាក់សាំងបានបញ្ចេញរូបភាពនៃដូសដែលមាននៅក្នុងប្រទេសឥណ្ឌាមុនពេលចាប់ផ្តើមការសិក្សាអំពីប្រសិទ្ធភាពរបស់វានៅទីនោះ។ ប្រទេសមួយចំនួនរួមមានហុងគ្រី វេណេហ្ស៊ូអេឡានិងអារ៉ាប់រួមបាននាំចូលបរិមាណគ្រប់គ្រាន់ដើម្បីធ្វើតេស្តផ្ទាល់ខ្លួន។

ទន្ទឹមនឹងនេះដែរ ប្រទេសហ្វីលីពីនបានប្រកាសថា ខ្លួននឹងធ្វើការជាមួយរុស្ស៊ីដើម្បីធានាសុវត្ថិភាពក្នុងការទទួលបានការផ្គត់ផ្គង់ដើម្បីចាប់ផ្តើមចាក់ថ្នាំបង្ការរោគទ្រង់ទ្រាយធំនៅដើមឆ្នាំក្រោយ៕

ប្រែសម្រួលដោយ៖ Vann Vann

ប្រភព៖ RT