ព័ត៌មានអន្ដរជាតិ

ចិន ផ្ទុះកំហឹងលើ អាមេរិក ក្រោយយន្តហោះយោធាចុះចតនៅ តៃវ៉ាន់ ទាំងដែលគ្មានទំនាក់ទំនងការទូត

បានផុស

៣ years មុន

នៅ

ថ្ងៃពុធ ១០ វិច្ឆិកា ២០២១

ដោយ

ប្រព័ន្ធផ្សព្វផ្សាយនៅតៃវ៉ាន់បានរាយការណ៍ថា សមាជិកសភាអាមេរិកបានហោះទៅកាន់កោះតៃវ៉ាន់ ដោយជិះយន្តហោះយោធាអាមេរិកកាលពីថ្ងៃអង្គារ ខណៈដំណឹងនេះបានទាក់ទាញការថ្កោលទោសយ៉ាងខ្លាំងពីប្រទេសចិន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូរទស្សន៍តៃវ៉ាន់ TVBS បានរាយការណ៍ថា សមាជិកទាំងសភាតំណាងរាស្ត្រអាមេរិក និងព្រឹទ្ធសភាបានធ្វើទស្សនកិច្ចនៅក្រុងតៃប៉ិ ។ ទន្ទឹមនោះ ទូរទស្សន៍នេះក៏បានផ្សាយវីដេអូនៃយន្តហោះដែលគេកំណត់ថាបានដឹកសមាជិកសភាអាមេរិកផងដែរ ប៉ុន្តែឈ្មោះ និងគោលបំណងនៃដំណើរទស្សនកិច្ចរបស់ពួកគេ មិនត្រូវបានគេបង្ហាញឲ្យដឹងឡើយ ។

វាជារឿងមិនធម្មតានោះទេដែលយន្តហោះយោធាអាមេរិកចុះចតនៅតៃវ៉ាន់ ព្រោះអាមេរិក និងតៃវ៉ាន់គ្មានទំនាក់ទំនងការទូតផ្លូវការណាមួយឡើយ ។ ការហោះហើរនេះបានធ្វើឡើង ក្រោយការហោះហើរលើកចុងក្រោយកាលពីខែមិថុនា ដែលយន្តហោះយោធាអាមេរិកបាននាំសមាជិកព្រឹទ្ធសភាអាមេរិកទៅកាន់កោះតៃវ៉ាន់ ហើយប្រធានាធិបតីតៃវ៉ាន់ Tsai Ing-wen បានជួបពួកគេនៅព្រលានយន្តហោះ ។

ស្របពេលជាមួយគ្នានេះ អ្នកនាំពាក្យក្រសួងការពារជាតិចិនកាលពីថ្ងៃអង្គារបានចេញសេចក្តីថ្លែងការណ៍ថ្កោលទោសដំណើរទស្សនកិច្ចចុងក្រោយនេះ ។

ក្រសួងបាននិយាយថា “តៃវ៉ាន់គឺជាផ្នែកដ៏ពិសិដ្ឋ និងមិនអាចបំបែកបាននៃទឹកដីចិន សកម្មភាពរបស់ភាគីអាមេរិកបានជ្រៀតជ្រែកយ៉ាងធ្ងន់ធ្ងរនៅក្នុងកិច្ចការផ្ទៃក្នុងរបស់ចិន ហើយធ្វើឲ្យប៉ះពាល់យ៉ាងធ្ងន់ធ្ងរដល់អធិបតេយ្យភាពទឹកដីរបស់ចិន និងគំរាមកំហែងយ៉ាងធ្ងន់ធ្ងរដល់សន្តិភាព និងស្ថិរភាពនៅច្រកសមុទ្រតៃវ៉ាន់” ។

សេចក្តីថ្លែងការណ៍នេះក៏បានព្រមានសហរដ្ឋអាមេរិក “ឲ្យបញ្ឈប់ជាបន្ទាន់នូវសកម្មភាពបង្កហេតុរបស់ខ្លួន បញ្ឈប់ជាបន្ទាន់នូវរាល់សកម្មភាពបំផ្លិចបំផ្លាញ ដែលនាំឲ្យភាពតានតឹងកាន់តែកើនឡើងនៅក្នុងច្រកសមុទ្រតៃវ៉ាន់ និងបញ្ឈប់ការបញ្ជូនសញ្ញាខុសទៅកាន់កងកម្លាំងបំបែកខ្លួន “ឯករាជ្យតៃវ៉ាន់” ។

បន្ថែមពីនេះ អ្នកនាំពាក្យយោធាចិនបាននិយាយកាលពីថ្ងៃអង្គារថា ខ្លួនក៏បានធ្វើការល្បាតត្រៀមប្រយុទ្ធក្នុងទិសដៅនៃច្រកសមុទ្រតៃវ៉ាន់ផងដែរ ។

អ្នកនាំពាក្យបាននិយាយថា សមយុទ្ធនេះគឺសំដៅទៅលើពាក្យសម្ដី និងសកម្មភាពខុសធ្ងន់ធ្ងររបស់ប្រទេសមួយចំនួនលើតៃវ៉ាន់ និងសកម្មភាពរបស់ពួកអបគមន៍តៃវ៉ាន់ ហើយបានពណ៌នាថា វាជាវិធានការចាំបាច់ដើម្បីការពារអធិបតេយ្យភាពរបស់ចិន ៕