យានយន្តបញ្ចេញផ្សែងខ្មៅនៅ ថៃ ត្រូវពិន័យជាទឹកប្រាក់ ១៨៣ដុល្លារ

នាយកដ្ឋានត្រួតពិនិត្យការបំពុលបរិស្ថានរបស់ប្រទេសថៃ (PCD) មានគោលបំណងកាត់បន្ថយការបំពុលខ្យល់ PM2.5 ប្រមាណ ២៥% ដោយការដាក់ពិន័យជាអតិបរមាក្រោមច្បាប់ចរាចរណ៍ លើអ្នកបើកបរណាដែលបញ្ចេញផ្សែងខ្មៅ បណ្តាលមកពីពួកគេថែទាំយានយន្តមិនល្អ។

យោងតាមប្រធាន PCD លោក Attaporn Charoenchansa បានឲ្យដឹងថា នាយកដ្ឋានបានធ្វើការយ៉ាងជិតស្និទ្ធជាមួយប៉ូលិសថៃ និងនាយកដ្ឋានដឹកជញ្ជូនផ្លូវគោក ដើម្បីអនុវត្តច្បាប់ឲ្យបានម៉ឺងម៉ាត់ ក្នុងគោលបំណងទប់ស្កាត់ការបំពុល។

ផ្សែងខ្មៅ ជាពិសេសចេញពីម៉ាស៊ីនម៉ាស៊ូត ត្រូវបានគេជឿថា បង្កើតបានប្រហែលមួយភាគបួននៃការបំពុលខ្យល់នៅក្នុងតំបន់ទីក្រុង។

លោកបានប្រាប់អ្នកសារព័ត៌មានថា “ការផាកពិន័យជាអតិបរមាចំនួន ៦,០០០ បាត (១៨៣ដុល្លារ) និងការដកហូតអាជ្ញាប័ណ្ណ នឹងត្រូវអនុវត្តចំពោះអ្នកដែលប្រព្រឹត្តល្មើសនឹងច្បាប់”។

លោក Attaporn និយាយថា នាយកដ្ឋាន និងដៃគូរបស់ខ្លួន បានត្រួតពិនិត្យរថយន្តជាង ២៥,០០០ គ្រឿងរួចហើយក្នុងឆ្នាំនេះ ហើយបានរារាំងរថយន្តចំនួន ១០០ គ្រឿងពីការប្រើប្រាស់រហូតដល់ម៉ាស៊ីនរបស់ពួកគេត្រូវបានជួសជុល ដូច្នេះពួកគេមិនបញ្ចេញផ្សែងខ្មៅទៀតទេ។

នៅឆ្នាំក្រោយ ច្បាប់ចរាចរណ៍នឹងត្រូវបានពង្រឹងបន្ថែមទៀត ដូច្នេះយានយន្តដែលបញ្ចេញផ្សែងខ្មៅ ៣០% ឬច្រើនជាងនេះ នឹងត្រូវពិន័យ៕

ប្រែសម្រួល៖ សន្យា

ប្រភព៖ Bangkok Post

ចុចអាន៖ អាមេរិក និង ចិន នៅតែបដិសេធមិនបញ្ចប់ការខួងយកប្រេង និងឧស្ម័ន