ថៃ ទទួលភ្ញៀវទេសចរបរទេសសរុប ៤៤,៧៧៤ នាក់ ចាប់តាំងពីបើកប្រទេស

ភ្ញៀវទេសចរបរទេសសរុប ៤៤,៧៧៤ នាក់បានចូលទស្សនាប្រទេសថៃ ចាប់តាំងពីប្រទេសនេះបើកទទួលទេសចរអន្តរជាតិឡើងវិញកាលពីប៉ុន្មានសប្តាហ៍មុន។

យោងតាមអ្នកនាំពាក្យរដ្ឋាភិបាលលោក Thanakorn Wangboonkongchana បានឲ្យដឹងថា លោកនាយករដ្ឋមន្ត្រី ប្រាយុទ្ធ ចាន់អូចា ពិតជារីករាយនឹងការកើនឡើងនៃចំនួនភ្ញៀវបរទេសនេះ ហើយលោករំពឹងថា ចំនួននឹងបន្តកើនឡើង ខណៈដែលក្រុមហ៊ុនអាកាសចរណ៍កាន់តែច្រើននៅមជ្ឈិមបូព៌ា និងអឺរ៉ុប កំពុងស្នើសុំកន្លែងចុះចតបន្ថែមនៅក្នុងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា ចាប់តាំងពីថ្ងៃទី១ខែវិច្ឆិកាមក ក្រុមហ៊ុនអាកាសចរណ៍ចំនួន១៨បន្ថែមទៀត បានចាប់ផ្តើមជើងហោះហើរឡើងវិញ ទៅនិងមកអាកាសយានដ្ឋានសុវណ្ណភូមិ នាំឲ្យចំនួនជើងហោះហើរសរុបដែលចេញចូលមជ្ឈមណ្ឌលអាកាសចរណ៍ដ៏សំខាន់របស់ទីក្រុងបាងកកមួយនេះ កើនដល់២,០០៨ជើង។

ទន្ទឹមនឹងនេះដែរ ក្រុមហ៊ុនអាកាសចរណ៍ចំនួន១៩ កំពុងប្រតិបត្តិការជើងហោះហើរចំនួន៧៩៣ជើង ក្នុងនិងក្រៅអាកាសយានដ្ឋានភូកេតក្នុងខែនេះ ពោលគឺកើនឡើង៣៩% ពីខែតុលា។

ក្នុងចំណោមភ្ញៀវបរទេសទាំង៤៤,៧៧៤នាក់ មាន៣១,៦៦៦នាក់ បានចូលប្រទេសថៃ តាមកម្មវិធី “Test and Go” ខណៈ ១០,៩៦៤ នាក់ ចូលតាមរយៈកម្មវិធី “Sandbox” ទេសចរណ៍ដែលកំពុងដំណើរការនៅក្នុងខេត្តចំនួន១៧។ ទន្ទឹមនឹងនេះ អ្នកទេសចរដែលនៅសល់ចំនួន ២,១៤៤នាក់ត្រូវឆ្លងកាត់រយៈពេលដាក់ឲ្យធ្វើចត្តាឡីស័កកូវីដតាមតម្រូវការ មុនពេលពួកគេត្រូវបានអនុញ្ញាតឲ្យធ្វើដំណើរ។

មានភ្ញៀវបរទេសតែ៥២នាក់ប៉ុណ្ណោះ ដែលបានធ្វើតេស្តវិជ្ជមានជំងឺកូវីដ-១៩ នៅពេលមកដល់ ពោលគឺស្មើនឹងប្រហែល ០,១២% នៃភ្ញៀវទាំងអស់៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ថៃ ពន្យារពេលបើក ក្លឹបរាត្រីរហូតដល់ពាក់កណ្តាលខែមករា