ព័ត៌មានអន្ដរជាតិ

អាមេនី និងអាស៊ែបៃហ្សង់ យល់ព្រមលើបទឈប់បាញ់គ្នាហើយ

បានផុស

៣ years មុន

នៅ

ថ្ងៃពុធ ១៧ វិច្ឆិកា ២០២១

ដោយ

កាលពីថ្ងៃអង្គារ៍ម្សិលមិញ ប្រទេសអាមេនី និងអាស៊ែបៃហ្សង់បានឈានដល់កិច្ចព្រមព្រៀងលើបទឈប់បាញ់គ្នានៅព្រំដែនហើយ។ នេះបើយោងតាមរដ្ឋមន្ត្រីក្រសួងការពារជាតិអាមេនីបាននិយាយ បន្ទាប់ពីប្រទេសរុស្ស៊ីបានជំរុញឲ្យពួកគេដកថយពីការប្រឈមមុខដាក់គ្នា ក្រោយពេលមានការប៉ះទង្គិចបណ្តាលឲ្យមនុស្សស្លាប់តាំងឆ្នាំមុន។

អាមេនីបានស្នើឲ្យរដ្ឋាភិបាលក្រុងមូស្គូជួយការពារខ្លួន បន្ទាប់ពីការប្រយុទ្ធគ្នាដ៏ខ្លាំងក្លាចាប់តាំងពីសង្គ្រាមរយៈពេល៤៤ថ្ងៃមួយកាលពីឆ្នាំមុនរវាងកម្លាំងជនជាតិភាគតិចអាមេនី និងកងទ័ពអាស៊ែបៃហ្សង់ នៅតំបន់ប្រឈម Nagorno-Karabakh ដែលបានសម្លាប់មនុស្សហោចណាស់៦៥០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជម្លោះបានបញ្ចប់ បន្ទាប់ពីរុស្ស៊ីដែលមានមូលដ្ឋានទ័ពនៅអាមេនីបានសម្របសម្រួលលើកិច្ចព្រមព្រៀងសន្តិភាពមួយ និងបានដាក់ពង្រាយកម្លាំងការពារសន្តិសុខប្រហែល២០០០នាក់នៅតំបន់នោះ។ ចំណែកប្រទេសតួកគីបានកាន់កាប់ផ្នែកមួយរបស់ប្រទេសអាស៊ែបៃហ្សង់ដែលទទួលបានមកវិញនូវដីដែលខ្លួនបានបាត់បង់កាលពីជម្លោះលើកមុន។

រដ្ឋមន្ត្រីក្រសួងការពារជាតិអាមេនីបាននិយាយថា ៖«អនុលោមតាមកិច្ចព្រមព្រៀងដែលសម្របសម្រួលដោយរុស្ស៊ី ការបាញ់គ្នាត្រូវបញ្ចប់នៅតំបន់ភាគខាងកើតព្រំដែនអាមេនី-អាស៊ែបៃហ្សង់ ហើយស្ថានភាពមានស្ថិរភាព»។

តាមការឲ្យដឹងពីវិមានក្រឹមឡាំងថា កាលពីព្រឹកថ្ងៃអង្គារ៍ លោកប្រធានាធិបតីរុស្ស៊ី វ្លាឌីមៀរ ពូទីន និងលោកនាយករដ្ឋមន្ត្រីអាមេនី Nikol Pashinyan បានពិភាក្សាតាមទូរសព្ទអំពីស្ថានភាពនៅព្រំដែន៕

ប្រែសម្រួល៖ វីរបុត្រ
ប្រភព៖ reuters