ព័ត៌មានអន្ដរជាតិ

អូទ្រីសដាក់បំរាមកូវីដពេញប្រទេសជាថ្មីផ្ទុះការប្រឆាំង

បានផុស

៣ years មុន

នៅ

ថ្ងៃចន្ទ ២២ វិច្ឆិកា ២០២១

ដោយ

ប្រទេសអូទ្រីសបានសម្រេចដាក់បំរាមកូវីដ-១៩ជាថ្មីទូទាំងប្រទេសដែលជំរុញឲ្យផ្ទុះការតវ៉ាយ៉ាងខ្លាំង ហើយប្រទេសផ្សេងៗទៀតនៅអឺរ៉ុបក៏មានផ្ទុះការប្រឆាំងនឹងបំរាមថ្មីដែរ។

ចាប់ពីពាក់កណ្តាលអធ្រាត្រ ថ្ងៃចន្ទនេះ ប្រជាជនអូទ្រីត្រូវបានបញ្ជាឲ្យធ្វើការងារពីផ្ទះ ហើយហាង អាជីវកម្មនានាមិនចាំបាច់ទាំងអស់ត្រូវបិទទ្វារ។ កាលពីសប្តាហ៍មុន អូទ្រីសបានក្លាយជាប្រទេសអឺរ៉ុបទី១ដែលបានបង្កើតច្បាប់តម្រូវការចាក់វ៉ាក់សាំងបង្ការកូវីដ-១៩។ ច្បាប់នេះនឹងចូលជាធរមាននៅខែកុម្ភៈខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការដាក់បំរាមទូទាំងប្រទេសលើកទី៤របស់អូទ្រីសចាប់តាំងពីកូវីដបានចាប់ផ្តើម។ អាជ្ញាធរបានបញ្ជាឲ្យអ្នកស្រុកស្ថិតនៅផ្ទះទាំងអស់ ប៉ុន្តែលើកលែងក្នុងលក្ខខណ្ឌចាំដូចជាសុខភាព និងអាហារជាដើម។

ភោជនីយដ្ឋាន បារ កាហ្វេ ហាងកាត់សក់ សាឡូន រោងភាពយន្ត និងហាងមិនចាំបាច់ផ្សេងៗត្រូវបិទទ្វារទាំងអស់។ វិធានការណ៍ទាំងនេះបន្តរហូតដល់ថ្ងៃទី១២ ខែធ្នូ បើទោះជាមន្ត្រីបាននិយាយថា ពួកគេនឹងបញ្ជាក់ជាថ្មី ក្រោយពេល១០ថ្ងៃ។

មនុស្សរាប់ពាន់បាននាំគ្នាតវ៉ានៅទីក្រុង Vienna ដើម្បីប្រឆាំងមុនបំរាមត្រូវបានដាក់ចេញ។ ក្រុមអ្នកតវ៉ាបាននាំគ្នាលើកបដាដែលមានសរសេរពាក្យថា «សេរីភាព» ហើយពួកគេស្រែកដាក់ប៉ូលិសថា «ប្រឆាំងៗ»។

ជាមួយគ្នានេះ បណ្តាប្រទេសជាច្រើនទៀតនៅអឺរ៉ុប នៅអឺរ៉ុបក៏មានផ្ទុះការតវ៉ាប្រឆាំងនឹងបំរាមដែរ។ ក្រុមតវ៉ាបានប៉ះទង្គិចគ្នាជាមួយប៉ូលិសនៅប្រទេសហុល្លង់ និងបែលហ្ស៊ិក។

អត្រាឆ្លងថ្មីហក់ឡើងយ៉ាងខ្លាំងនៅអឺរ៉ុបដែលជំរុញឲ្យអង្គការសុខភាពពិភពលោក (WHO) មានការព្រមាន។ កាលពីថ្ងៃសៅរ៍ នាយកតំបន់របស់ WHO លោកវេជ្ជបណ្ឌិត Hans Kluge បាននិយាយថា លុះត្រាតែវិធានការណ៍រឹតបណ្តឹងទូទាំងអឺរ៉ុប បូករួមទាំងការចាក់វ៉ាក់សាំង ពាក់ម៉ាស់ និងប័ណ្ណកូវីដទើបអាចទប់ស្កាត់បាន បើពុំនោះទេមនុស្សពាក់កណ្តាលលាននាក់អាចនឹងបាត់បង់ជីវិតនាពេលខាងមុខ៕

ប្រែសម្រួល៖ វីរបុត្រ
ប្រភព៖ BBC