ព័ត៌មានអន្ដរជាតិ

ស្ត្រីគុយបាចោទវីរបុរសបាល់ទាត់អាហ្សង់ទីន Maradona រំលោភនាងតាំងពីអាយុ១៦ឆ្នាំ

បានផុស

៣ years មុន

នៅ

ថ្ងៃអង្គារ ២៣ វិច្ឆិកា ២០២១

ដោយ

ស្ត្រីគុយបាឈ្មោះ Mavys Álvarez ដែលមានទំនាក់ទំនងជាមួយលោក Diego Maradona តាំងពី២០ឆ្នាំមុនបានចោទប្រកាន់វីរបុរសបាល់ទាត់អាហ្សង់ទីនរូបនេះថា បានចាប់រំលោភនាងតាំងពីក្មេងជំទង់ និងបានប្លន់ភាពបរិសុទ្ធរបស់នាង។

ឥឡូវនេះ Álvarez មានអាយុ៣៧ឆ្នាំដែលបានផ្តល់សក្ខីកម្មកាលពីសប្តាហ៍មុននៅតុលាការក្រសួងយុត្តិធម៌ប្រទេសអាហ្សង់ទីនដែលកំពុងស៊ើបអង្កេតជុំវិញការចោទប្រកាន់របស់នាងលើលោក Maradona តាំងពីនាងអាយុ១៦ឆ្នាំ។

លោក Maradona ដែលជាតារាបាល់ទាត់ដ៏ល្បីល្បាញបានទទួលមរណភាពកាលពីខែវិច្ឆិកា ឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក្យបណ្តឹងពាក់ព័ន្ធនឹងការធ្វើដំណើររបស់នាង Álvarez ទៅប្រទេសអាហ្សង់ទីនជាមួយលោក Maradona ក្នុងឆ្នាំ២០០១ដែលពេលនោះវីរបុរសបាល់ទាត់អាយុប្រហែល៤០ឆ្នាំ ហើយនាងទើបអាយុ១៦ឆ្នាំ។

នាង Álvarez បាននិយាយថា នាងបានជួបលោក Maradona លើកដំបូងមុនពេលធ្វើដំណើរទៅអាហ្សង់ទីនបន្តិចដែលនៅពេលនោះវីរបុរសអាហ្សង់ទីនស្ថិតនៅប្រទេសគុយបាដើម្បីព្យាបាលការញៀនថ្នាំ។

នៅក្នុងសន្និសីទសារព័ត៌មាននៅទីក្រុង Buenos Aires នាង Álvarez បានចោទលោក Maradona បានចាប់រំលោភនាងនៅគ្លីនិកមួយនៅ Havana ដែលលោក Maradona កំពុងស្នាក់នៅ ខណៈម្តាយនាងស្ថិតនៅក្នុងបន្ទប់ជិតនោះ។

Álvarez បាននិយាយថា ៖«គាត់បិទមាត់ខ្ញុំ ចាប់រំលោភ។ ខ្ញុំមិនចង់គិតច្រើនរឿងនោះទេ។ ខ្ញុំជាក្មេងស្រី ភាពបរិសុទ្ធរបស់ខ្ញុំត្រូវបានលួច។ វាពិតជាឈឺចាប់។ ខ្ញុំឈប់រស់នៅក្នុងភាពបរិសុទ្ធដែលជាក្មេងស្រីជួបបទពិសោធបែបនេះ»។

Álvarez ធ្លាប់បានចាត់ទុកទំនាក់ទំនងរបស់នាងជាមួយលោក Maradona ក្នុងបទសម្ភាសជាមួយអ្នកសារព័ត៌មានថាជា «ការឯកភាេះ» ប៉ុន្តែនាងក៏បាននិយាយដែរថា យ៉ាងហោចណាស់ លោក Maradona ធ្លាប់ចាប់បង្ខំនាងម្តងដែរ។

នាងថា គ្រួសាររបស់នាងបានត្រឹមតែអនុញ្ញាតឲ្យមានទំនាក់ទំនងជាមួយតារាបាល់ទាត់នេះ បើទោះជាអាយុខុសគ្នាឆ្ងាយក៏ដោយ ពីព្រោះលោក Maradona មានទំនាក់ទំនងមិត្តភាពជាមួយអតីតប្រធានាធិបតីគុយបាលោក Fidel Castro។

Álvarez និយាយថា នាងដាក់ពាក្យបណ្តឹងដើម្បីជួយដល់ស្ត្រីរងគ្រោះទាំងអស់ពីការកេងប្រវ័ញ្ច។ ដើម្បីអាចជួយពួកគេតាមអ្វីដែលខ្ញុំអាច។ នេះជាគោលបំណងខ្ញុំ»៕