អ៊ីតាលី ពិន័យក្រុមហ៊ុន Amazon និង Apple ជាង ២០០លានដុល្លារ

អាជ្ញាធរអ៊ីតាលី បានពិន័យក្រុមហ៊ុនបច្ចេកវិទ្យាយក្សអាមេរិក Amazon.com និង Apple ជាទឹកប្រាក់សរុប ២២៥,២៥០,០០០ ដុល្លារ សម្រាប់ការចោទប្រកាន់ថា បានចូលរួមកិច្ចសហប្រតិបត្តិការប្រឆាំងការប្រកួតប្រជែង ដើម្បីលក់ផលិតផល Apple និង Beats។

អាជ្ញាធរបាននិយាយថា “បទប្បញ្ញត្តិកិច្ចសន្យា នៃកិច្ចព្រមព្រៀងដែលបានចូលជាធរមាននៅថ្ងៃទី ៣១ ខែតុលាឆ្នាំ ២០១៨ បានរារាំងអ្នកលក់បន្តផ្លូវការនិងមិនផ្លូវការ ពីការលក់ចេញនូវផលិតផល Apple និង Beats ក្រៅពីវេបសាយលក់អនឡាញ Amazon អ៊ីតាលី។

បន្ថែមពីនេះ កិច្ចព្រមព្រៀងនោះបញ្ជាក់ថា ផលិតផល apple និង Beat អនុញ្ញាតឲ្យដាក់លក់តែនៅលើទីផ្សារ Amazon និង ជម្រើសភាគី ដែលមានចែងនៅក្នុងកិច្ចព្រមព្រៀងតែប៉ុណ្ណោះ”។

ក្រុមឃ្លាំមើលអ៊ីតាលីនិយាយថា ទង្វើនេះបានបំពានច្បាប់របស់សហភាពអឺរ៉ុប និងពិន័យជាប្រាក់ចំនួន ៧៧,៣៥០,០១៧ ដុល្លារលើក្រុមហ៊ុន Amazon និងចំនួន ១៥១,៤៣៤,២២២ ដុល្លារលើក្រុមហ៊ុន Apple។

ទោះបីជាយ៉ាងណាក៏ដោយ ក្រុមហ៊ុន Apple បានបដិសេធធ្វើខុស ហើយគ្រោងនឹងប្តឹងឧទ្ធរណ៍៕

ប្រែសម្រួល៖ Vann Vann

ប្រភព៖ RTE

ចុចអាន៖ នាយកក្រុមហ៊ុន Amazon រងការចោទប្រកាន់ករណីរត់ពន្ធកញ្ឆា