ប្រទេសអាស៊ីអាគ្នេយ៍ ហាមឃាត់អ្នកដំណើរមកពីអាហ្វ្រិក ខ្លាចនាំវីរុសបំប្លែងខ្លួនសាហាវប្រភេទថ្មី

សិង្ហបុរី នឹងដាក់កំហិតការចូលប្រទេស ចំពោះអ្នកធ្វើដំណើរដែលមានប្រវត្តិធ្វើដំណើរថ្មីៗនេះ ទៅកាន់ប្រទេសអាហ្វ្រិកចំនួនប្រាំពីរ បន្ទាប់ពីមានរបាយការណ៍ថា មេរោគកូវីដ១៩បំប្លែងខ្លួនឆ្លងសាហាវដ៏គ្រោះថ្នាក់ អាចនឹងចរាចរនៅទីនោះ។

ចាប់ពីម៉ោង១១:៥៩យប់ថ្ងៃសៅរ៍ទៅ អ្នកកាន់លិខិតឆ្លងដែនរយៈពេលវែង និងភ្ញៀវទេសចររយៈពេលខ្លីទាំងអស់ដែលមានប្រវត្តិធ្វើដំណើរក្នុងរយៈពេល១៤ថ្ងៃចុងក្រោយ ទៅកាន់ប្រទេស បុតស្វាណា អេស្វាទីនី ឡេសូតូ ម៉ូសំប៊ិក ណាមីប៊ី អាហ្វ្រិកខាងត្បូងនិង ស៊ីមបាវ៉េ នឹងមិនត្រូវបានអនុញ្ញាតឲ្យចូលសិង្ហបុរី ឬឆ្លងកាត់ទីនោះទេ។ .

ការរឹតបន្តឹងនេះ ក៏អនុវត្តផងដែរចំពោះអ្នកដែលទទួលបានការយល់ព្រមជាមុន សម្រាប់ការចូលប្រទេសសិង្ហបុរី។

ទោះបីជាយ៉ាងណាក៏ដោយ ពលរដ្ឋសិង្ហបុរី និងអ្នករស់នៅអចិន្ត្រៃយ៍ដែលវិលត្រឡប់មកពីប្រទេសទាំងនេះ នឹងត្រូវជូនដំណឹងអំពីការស្នាក់នៅមួយកន្លែងរយៈពេល១០ថ្ងៃ នៅទីតាំងជាក់លាក់មួយ។

ក្រសួងសុខាភិបាលសិង្ហបុរី បាននិយាយថា “អ្នកវិទ្យាសាស្ត្រជុំវិញពិភពលោក នៅតែកំពុងព្យាយាមស្វែងយល់បន្ថែមទៀត អំពីវីរុសកូវីដបំប្លែងខ្លួនថ្មី B.1.1.529 ដូចជាថាតើវាឆ្លងខ្លាំងជាង Delta, វាទំនងជានាំទៅរកជំងឺធ្ងន់ធ្ងរ និងមានភាពធន់នឹងប្រសិទ្ធភាពនៃវ៉ាក់សាំងដែលមានស្រាប់នាពេលបច្ចុប្បន្ននេះដែរឬទេ”។

យាងណាក្តី ក្រសួង​អះអាង​ថា បច្ចុប្បន្ន ​ប្រទេស​សិង្ហបុរី​មិន​មាន​ករណី​ឆ្លង​វីរុសបំប្លែងខ្លួនប្រភេទនេះនៅឡើយ​ទេ៕

ប្រែសម្រួល៖ Vann Vann

ប្រភព៖ CNA

ចុចអាន៖ អង់គ្លេស រឹតបន្តឹងការធ្វើដំណើរមកពីអាហ្វ្រិក ដោយសារវីរុសបំប្លែងថ្មីដ៏គ្រោះថ្នាក់