ពលរដ្ឋអេស្ប៉ាញ ២០ លាននាក់អាចនឹងទទួលការចាក់វ៉ាក់សាំងកូវីដ នៅមុនរដូវក្តៅ

នាយករដ្ឋមន្រ្តីរបស់ប្រទេសអេស្ប៉ាញបាននិយាយកាលពីថ្ងៃសុក្រថា មនុស្សដល់ទៅ ២០ លាននាក់នៅក្នុងប្រទេសអេស្ប៉ាញអាចត្រូវបានចាក់វ៉ាក់សាំងប្រឆាំងនឹងជំងឺកូវីដ ១៩ នៅខែឧសភា ឬមិថុនា ឆ្នាំ ២០២១ ។

សុន្ទរកថារបស់លោក Pedro Sanchez បានកើតឡើងមួយថ្ងៃ នៅពេលដែលស្ថានភាពរោគរាតត្បាតរបស់ប្រទេសអេស្ប៉ាញបានបង្ហាញនូវសញ្ញាធ្លាក់ចុះករណីឆ្លងបន្ថែមទៀត ។

ក្រសួងសុខាភិបាលបានរាយការណ៍ថាមានអ្នកឆ្លងថ្មីចំនួន ៨,៧៤៥ នាក់កាលពីថ្ងៃសុក្រដោយធ្លាក់ចុះជិត ១,៤០០ នាក់កាលពីថ្ងៃព្រហស្បតិ៍ ។

សាររបស់លោក Sanchez អំពីការចាក់វ៉ាក់សាំងក៏មានសុទិដ្ឋិនិយមផងដែរដោយលោកបាននិយាយថា រដ្ឋាភិបាលប៉ាន់ប្រមាណថា ប្រជាជនដែលងាយរងគ្រោះបំផុតនៅអេស្ប៉ាញដែលស្មើនឹង ៤៣ ភាគរយនៃប្រជាជនទាំងអស់នឹងត្រូវចាក់វ៉ាក់សាំងមុនរដូវក្តៅ ។

អេស្ប៉ាញបានដាក់ការបញ្ជាទិញវ៉ាក់សាំងចំនួន ១៤០ លានដូសដោយគ្រប់គ្រាន់សម្រាប់មនុស្ស ៨០ លាននាក់ ទោះបីជាចំនួនប្រជាជនរបស់ប្រទេសនេះមានប្រហែលជា ៤៧ លាននាក់ក៏ដោយ ។

ទន្ទឹមនឹងនេះដែរការស្ទង់មតិប្រចាំខែរបស់មជ្ឈមណ្ឌលស្រាវជ្រាវវិទ្យាសាស្ត្រសង្គមអេស៉្បាញ (CIS) ដែលចេញផ្សាយនៅថ្ងៃសុក្របានរកឃើញថា ៥៥ ភាគរយនៃអ្នកឆ្លើយសំណួរនឹងរង់ចាំយូរជាងនេះបន្តិចក្នុងការចាក់វ៉ាក់សាំង រីឯ ៣២ ភាគរយទៀតនិយាយថា ពួកគេចង់បានការចាក់វ៉ាក់សាំងភ្លាមៗនៅពេលវាត្រូវបានអនុម័ត ខណៈជាង ៨ ភាគរយនៃអ្នកដែលបានស្ទង់មតិបាននិយាយថា ពួកគេមិនចង់ចាក់វ៉ាក់សាំងអ្វីទាំងអស់ ។

គួរបញ្ជាក់ថា គិតត្រឹមពេលនេះប្រទេសអេស្ប៉ាញមានករណីឆ្លងជំងឺកូវីដ ១៩ ចំនួន ១,៦៩៩,១៤៥ ករណី និងមានអ្នកស្លាប់ចំនួន ៤៦,២៥២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ដំណឹងល្អ! កម្ពុជា និងប្រទេសអាស៊ីអាគ្នេយ៍ ៥ ទៀតនឹងទទួលបានវ៉ាក់សាំងកូវីដ

ចុចអាន ៖ ប្រទេសមួយទៀតអនុញ្ញាតឲ្យប្រើប្រាស់វ៉ាក់សាំងរបស់ក្រុមហ៊ុន Pfizer បន្ទាប់ពីអង់គ្លេស