ព័ត៌មានអន្ដរជាតិ

ទើបលាឈប់ ឥឡូវនាយករដ្ឋមន្ត្រីស្ត្រីដំបូងស៊ុយអែតត្រូវបានតែងតាំងជាថ្មី

បានផុស

៣ years មុន

នៅ

ថ្ងៃអង្គារ ៣០ វិច្ឆិកា ២០២១

ដោយ

នាយករដ្ឋមន្ត្រីស្ត្រីដំបូងគេរបស់ប្រទេសស៊ុយអែត លោកស្រី Magdalena Andersson ត្រូវបានតែងតាំងជាថ្មីកាលពីថ្ងៃចន្ទម្សិលមិញ បន្ទាប់ពីលោកស្រីលាលែងពីតួនាទីមិនដល់មួយសប្តាហ៍ផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាជិកសភាបានបោះឆ្នោតតែងតាំងលោកស្រីជានាយករដ្ឋមន្ត្រីលើកទី២ក្នុងរយៈពេលមិនដល់មួយសប្តាហ៍ផង បន្ទាប់ពីលោកបានរៀបចំផែនការបង្កើតរដ្ឋាភិបាលឯកបក្សដែលមានតែគណបក្សសង្គមប្រជាធិបតេយ្យតែមួយគត់។

អតីតរដ្ឋមន្ត្រីក្រសួងហិរញ្ញវត្ថុបានឈ្នះការបោះឆ្នោតដូចគ្នានេះម្តងហើយកាលពីថ្ងៃពុធសប្តាហ៍មុនដើម្បីក្លាយជានាយករដ្ឋមន្ត្រីស្ត្រីដំបូងគេក្នុងប្រវត្តិសាស្ត្របរបស់ប្រទេសស៊ុយអែត ប៉ុន្តែក្នុងរយៈពេលមិនដល់១២ម៉ោងក្រោយមក លោកស្រីបានប្រាប់រដ្ឋសភាលាឈប់ពីតួនាទីជានាយករដ្ឋមន្ត្រី ដោយសារតែគណបក្សបៃតងដែលចូលរួមជាសម្ព័នចម្រុះជាមួយលោកស្រីបានដកខ្លួន ព្រោះតែរដ្ឋសភាមិនអនុម័តថវិកាសម្រាប់ក្រុមសម្ព័ន្ធចម្រុះ។

លោកស្រី Andersson ដែលគណបក្សរបស់លោកស្រីមាន១០០អាសនៈក្នុងចំណោមអាសនៈសភា៣៤៩បានប្រាប់សន្និសិទសារព័ត៌មានថា ៖«ដូចរដ្ឋាភិបាលភាគតិចទាំងអស់ យើងនឹងស្វែងរកកិច្ចសហប្រតិបត្តិការជាមួយគណបក្សផ្សេងៗនៅក្នុងសភា ហើយខ្ញុំឃើញឱកាសល្អដើម្បីការងារបែបនេះ»។

«គណបក្សសង្គមប្រជាធិបតេយ្យមានគ្រុបគណបក្សធំជាងគេនៅក្នុងសភាដោយរឹងមាំ។ យើងក៏មានប្រពៃណីនៃសហប្រតិបត្តិការជាមួយគណបក្សដទៃ និងឈរលើគោលការណ័ពីអ្វីដែលយើងត្រូវដឹកនាំស៊ុយអែតឆ្ពោះទៅមុខ»។ លោកស្រីបានបញ្ជាក់។

មេដឹកនាំគណបក្សប្រឆាំងស្តាំនិយម Moderate Party លោក Ulf Kristersson បានចាត់ទុករដ្ឋបាលដែលនឹងកើតខាងមុខគឺជារដ្ឋាភិបាលចាំផ្ទះ៩ខែ និងនិយាយថា វានឹងមិនអាចទទួលបានជោគជ័យសម្រាប់ការបោះឆ្នោតនាខែកញ្ញា ឆ្នាំ២០២២ទេ។

លោកស្រី Andersson នឹងត្រូវដឹកនាំរដ្ឋាភិបាលទន់ខ្សោយបំផុតក្នុងចំណោមរដ្ឋាភិបាលទន់ខ្សោយរបស់ស៊ុយអែតក្នុងរយៈពេលប៉ុន្មានទសវត្សរ៍ចុងក្រោយនេះ និងត្រូវប្រឈមបញ្ហាជាច្រើន៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសស៊ុយអែត