អ្នកវិទ្យាសាស្ត្រ អង់គ្លេស ប្រាប់របៀបតេស្តរក Omicron ឯលទ្ធផលមិន ១០០ ភាគរយ

បើយោងតាមអ្នកវិទ្យាសាស្ត្រអង់គ្លេសបានឲ្យដឹងថា ការធ្វើតេស្តរកវីរុសបំប្លែងខ្លួនថ្មី Omicron ក៏មិនខុសពីការធ្វើតេស្តរកវីរុសផ្សេងទៀតនោះទេ ដោយយកសំណាកទៅតេស្តក្នុងម៉ាស៊ីនធំ PCR រួចហើយបញ្ជូនទៅមន្ទីរពិសោធន៍ដើម្បីវិភាគធ្វើរោគវិនិច្ឆ័យថាតើវាជាវីរុសបំប្លែងខ្លួនប្រភេទណា ។

អ្នកវិទ្យាសាស្ត្រអង់គ្លេសអះអាងថា ការធ្វើតេស្តដំបូងតម្រូវឲ្យយកសំណាកនោះចូលទៅក្នុងម៉ាស៊ីន PCR បន្ទាប់មកត្រូវធ្វើតេស្តលើហ្សែនរបស់វីរុស Omicron ហើយគេយកចំណុច ៣ សំខាន់ ។

ចំណុចទី ១ គឺ Spike ឬបន្លា (S) ជាដៃខាងក្រៅរបស់មេរោគ បន្ទាប់មកគេយកកោសិកាមួយទៀតឈ្មោះ N2 គឺជាសំបកខាងក្នុងរបស់មេរោគ ។ ចំណែកចុងក្រោយគេយកកោសិកា ឬសំបកខាងក្រៅ (E) របស់មេរោគ ។

អ្នកវិទ្យាសាស្រ្តបញ្ជាក់ថា នៅ ពេលដែលតេស្តរួចហើយ គេនឹងពិនិត្យមើលគំរូហ្សែនលើ Spike ឬបន្លា ប៉ុន្តែការចេញលទ្ធផលនោះក៏មិនប្រាកដ ១០០ ភាគរយដែរ ពោលវាអាចជាវីរុសបំប្លែងខ្លួន Omicron ឬក៏មិនមែនក៏ថាបាន ។

ពាក់ព័ន្ធនឹងបញ្ហានេះ យោងតាមសារព័ត៌មាន BBC បានចុះផ្សាយថា គឺដោយសារតែចក្រភពអង់គ្លេសមានមន្ទីរពិសោធន៍ទំនើបៗធ្វើរោគវិភាគលើវីរុសបំប្លែងខ្លួន Omicron តិចតួចបំផុត ពោលមានតែ ៣ ទីតាំងប៉ុណ្ណោះ ។

គួរបញ្ជាក់ថា ចក្រភពអង់គ្លេសបានរឹតបន្តឹងជើងហោះហើរសម្រាប់ប្រទេសអាហ្វ្រិកចំនួន ៦ ដូចជា អាហ្រ្វិកខាងត្បូង ណាមីប៊ី ឡេសូតូ បុតស្វាណា អេស្វាធីនី និងស៊ីមបាវ៉េ ហើយរហូតមកដល់ពេលនេះបានកត់ត្រាករណីវីរុសបំប្លែងខ្លួនប្រភេទ B.1.1.529 ចំនួន ២២ ករណីហើយ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ ប្រុងប្រយ័ត្ន! វីរុសកូវីដបំប្លែងខ្លួន Omicron ឆ្លងសាហាវជាង Delta រហូតដល់ ៥ ដង