ថៃ អួតថា វីរុស Omicron មានឱកាសតិចណាស់ចូលក្នុងប្រទេសខ្លួន ដោយសារវិធានការទាំងនេះ

រដ្ឋមន្ត្រីក្រសួងទេសចរណ៍ និងកីឡាថៃលោក Phiphat Ratchakitprakarn បាននិយាយនៅ ថ្ងៃសុក្រនេះថា ក្រសួងសុខាភិបាលសាធារណៈកំពុងតាមដានភ្ញៀវទេសចរទាំងអស់ដែលមានហានិភ័យនៃការឆ្លងជំងឺកូវីដ ១៩ ។

លោក Phiphat បន្ថែមថា បច្ចុប្បន្ននេះ មិនមានការព្រួយបារម្ភអំពីការផ្ទុះឡើងនៃវីរុសបំប្លែងខ្លួន Omicron នោះទេ ពីព្រោះរហូតមកដល់ពេលនេះ គ្មាននរណាម្នាក់នៅ ក្នុងប្រទេសថៃបានធ្វើតេស្តវិជ្ជមានចំពោះវីរុសនេះនោះទេ ។

ទន្ទឹមនោះ លោកក៏បានណែនាំប្រជាជនកុំឲ្យព្រួយបារម្ភអំពីអ្នកដំណើរមកពីប្រទេសអាហ្វ្រិកទាំង ៨ ដែលមានហានិភ័យខ្ពស់ ព្រោះវាស្ថិតនៅ ក្រោមការគ្រប់គ្រងយ៉ាងតឹងរ៉ឹងរបស់ការិយាល័យអន្តោប្រវេសន៍ ។

លោកបានបន្ថែមថា ភ្ញៀវទេសចរចំនួន ៣៣០ នាក់មកពីប្រទេសអាហ្វ្រិកចំនួន ៨ ដែលហានិភ័យខ្ពស់នៃការឆ្លងវីរុសបំប្លែងខ្លួន Omicron គឺស្ថិតនៅ ក្រោមការធ្វើចត្តាឡីស័ករហូតដល់ ២ សប្តាហ៍ ហើយនឹងឆ្លងកាត់ការធ្វើតេស្តម៉ាស៊ីន RT-PCR ចំនួន ៣ ដង ។

លោក​បាន​និយាយថា ក្នុងចំណោមអ្នកទេសចរ ៣៣០ នាក់ក្នុងនោះ ២៥២ នាក់បានមកដល់ក្រោមគម្រោងប្រអប់ខ្សាច់ Sandbox របស់ប្រទេសថៃ និង ៧៨ នាក់ក្រោមការធ្វើចត្តាឡីស័ករបស់គម្រោងក្នុងចន្លោះថ្ងៃទី ១៥ ដល់ ២៧ ខែវិច្ឆិកា ហើយរហូតមកដល់ពេលនេះ ក្រសួង​សុខាភិបាល​សាធារណៈ​នៅ​ តែ​អាច​ទប់​ស្កាត់​ការ​រីក​រាល​ដាល​នៃ​ជំងឺ​កូវីដ ១៩ បាន ។

គួររំឭកថា គិតត្រឹមថ្ងៃទី ១ ខែធ្នូ ប្រទេសថៃបានហាមឃាត់ការហោះហើរពីប្រទេសបុតស្វាណា, អេស្វាទីនី, ឡេសូតូ, ម៉ាឡាវី, ម៉ូស៊ំបិក, ណាមីប៊ី, អាហ្វ្រិកខាងត្បូង និងស៊ីមបាវ៉េ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation

ចុចអាន ៖ ថៃ ប្រកាសដាក់ខេត្ត Nakhon Si Thammarat ជាតំបន់គ្រោះមហន្តរាយ