អាហ្វ្រិកបន្ទោសពិភពលោកវិញចំពោះការផ្ទុះឡើង Omicron

កាលពីសប្តាហ៍មុន អង្គការសុខភាពពិភពលោក (WHO) បានលើកឡើងពីក្តីបារម្ភជុំវិញវីរុសកូវីដបំប្លែងខ្លួន Omicron ដែលត្រូវបានរកឃើញដំបូងនៅ អាហ្វ្រិកខាងត្បូង ។ ការលេចចេញនេះកើតឡើង នៅ ពេលដែលទ្វីបអាហ្រ្វិកតស៊ូជាមួយនឹងអត្រានៃការចាក់វ៉ាក់សាំងទាប ខណៈ WHO ប៉ាន់ស្មានថា មានតែ ៧.៥ ភាគរយប៉ុណ្ណោះ ។

ទន្ទឹមនោះ អ្នកជំនាញអាហ្រ្វិកខាងត្បូងលោក Solly Moeng បានប្រាប់សារព័ត៌មាន Sputnik ថា សហគមន៍អន្តរជាតិមិនគួរស្តីបន្ទោសប្រទេសអាហ្រ្វិកសម្រាប់អត្រាចាក់វ៉ាក់សាំងទាបនោះទេ ខណៈពេលដែលពួកគេកំណត់លទ្ធភាពក្នុងការទទួលបានវ៉ាក់សាំងទៅ ឲ្យអាហ្វ្រិក ។

លោក Moeng បាននិយាយថា “ប្រទេសជាច្រើននៃទ្វីបអាហ្រ្វិកកំពុងជួបការលំបាកក្នុងការទទួលបានវ៉ាក់សាំង ។ ពិភពលោកអាចបដិសេធការចាក់វ៉ាក់សាំងទៅ កាន់ទ្វីបអាហ្រ្វិក ហើយនៅ តែបន្ទោសជនជាតិអាហ្រ្វិកថាមិនបានចាក់វ៉ាក់សាំងឲ្យបានគ្រប់គ្រាន់ ដែលជារឿងមិនសមហេតុសមផល”។

លោក Moeng បានកត់សម្គាល់ថា ប្រទេសអភិវឌ្ឍន៍ទាំងនេះមានបរិមាណដ៏ច្រើននៃវ៉ាក់សាំងដែលរដ្ឋកំពុងអភិវឌ្ឍន៍ចង់ទិញ និងចង់បាន ប៉ុន្តែកំពុងត្រូវបានរារាំងមិនឲ្យទទួលបាន ។

លោក Moeng ជឿជាក់ថា វីរុសកូវីដបំប្លែងខ្លួន omicron មានផលប៉ះពាល់អវិជ្ជមាននៅទូទាំងពិភពលោក និងធ្វើឲ្យខូចសេដ្ឋកិច្ចអាហ្វ្រិក ។ លោកបាននិយាយថា អ្នកវិទ្យាសាស្ត្រមិនបានត្រៀមខ្លួនទេ ពួកគេទំនងជាគិតថា វាមានសារៈសំខាន់ក្នុងការប្រកាសអំពីវីរុសថ្មីនេះឲ្យបានលឿនតាមដែលអាចធ្វើទៅ បាន ។

គួរបញ្ជាក់ថា វីរុស​កូវីដបំប្លែងខ្លួន Omicron ​ត្រូវ​បាន​​រក​ឃើញ​ជា​លើក​ដំបូង​នៅ​ អាហ្វ្រិក​ខាង​ត្បូង ហើយ​បាន​រាយការណ៍​ទៅ​ អង្គការ​សុខភាព​ពិភពលោក (WHO) នៅ​ ថ្ងៃ​ទី ២៤ ខែ​វិច្ឆិកា ។

ចាប់តាំងពីពេលនោះមក វាបានរីករាលដាលដល់ប្រទេសជាច្រើន រួមទាំងនៅ អឺរ៉ុប និងអាស៊ី ដែលរហូតមកដល់ពេលនេះក៏មានការរឹតបន្តឹងការធ្វើដំណើរបណ្ដាប្រទេសមកពីអាហ្វ្រិកផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ្នកវិទ្យាសាស្ត្រថា ចាក់វ៉ាក់សាំង ៣ ដូសមិនគ្រប់គ្រាន់ទេ ៤ ដូសទើបកម្ចាត់ Omicron