វៀតណាម ប្រកាសបិទខ្ទប់ ទីក្រុងហាណូយ

រនាំងត្រូវបានដំឡើងនៅ តាមដងផ្លូវ និងផ្លូវជាច្រើននៅ ទូទាំងទីក្រុងហាណូយ ដើម្បីបិទខ្ទប់តំបន់ដែលមានហានិភ័យខ្ពស់នៃការឆ្លងកូវីដកាលពីរសៀលថ្ងៃអាទិត្យ បន្ទាប់ពីក្រសួងសុខាភិបាលបានប្រកាសរកឃើញករណីឆ្លងប្រចាំថ្ងៃថ្មីក្នុងទីក្រុងចំនួន ៤៥៥ ករណី ។

វាមានរយៈពេលជាង ២ ខែហើយ ចាប់តាំងពីរបាំងបែបនេះត្រូវបានគេឃើញចុងក្រោយនៅ ក្នុងរដ្ឋធានីវៀតណាមមួយនេះ ។ ទីក្រុងហាណូយ បានដាក់ចេញបទប្បញ្ញត្តិគម្លាតសង្គមយ៉ាងតឹងរ៉ឹងនៅ គ្រប់សង្កាត់ក្នុងអំឡុងខែកក្កដា និងសីហា នៅ ពេលដែលអាជ្ញាធរថ្នាក់ស្រុក និងសង្កាត់រៀបចំប៉ុស្តិ៍ត្រួតពិនិត្យ និងរបាំងនៅ តាមដងផ្លូវ និងផ្លូវតូចៗក្នុងគោលបំណងទប់ស្កាត់ការរីករាលដាលនៃជំងឺកូវីដ ១៩ ។

គួរបញ្ជាក់ថា ទីក្រុងហាណូយបានកត់ត្រាការឆ្លងជំងឺកូវីដ ១៩ ច្រើនជាង ១៣,០០០ ករណី ចាប់តាំងពីរលកឆ្លងទី ៤ បានវាយប្រហារប្រទេសវៀតណាមកាលពីថ្ងៃទី ២៧ ខែមេសា ។

ទន្ទឹមនោះ រដ្ឋធានីមួយនេះបានកត់ត្រាករណីចំនួន ៧៩១ ករណីកាលពីថ្ងៃសុក្រ, ៤៥៥ ករណីកាលពីថ្ងៃសៅ រ៍ និង ៤០០ ករណីកាលពីថ្ងៃអាទិត្យ ខណៈរហូតមកដល់ពេលនេះ ប្រជាជនជាង ៦.៦ លាននាក់ក្នុងចំណោមប្រជាជន ៨ លាននាក់នៃទីក្រុងបានទទួលការចាក់វ៉ាក់សាំងកូវីដយ៉ាងហោចណាស់មួយដូស ខណៈជាង ៥.៥ លាននាក់ក្នុងចំណោមពួកគេបានចាក់ពេញដូស ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ប្រុងប្រយ័ត្ន! ប្រទេសអាស៊ាន ២ ហើយរកឃើញវីរុសបំប្លែងខ្លួន Omicron