គ្រូពេទ្យជំនាញ ថៃ ថា កុំភ័យស្លន់ស្លោចំពោះ Omicron ព្រោះវាជា ធម្មជាតិវដ្តជីវិតវីរុស (មានវីដេអូ)

លោកវេជ្ជបណ្ឌិត Yong Poovorawan ដែលជាអ្នកជំនាញខាងមេរោគមកពីសាកលវិទ្យាល័យ Chulalongkorn នៃប្រទេសថៃបាននិយាយថា សាធារណជនមិនគួរភ័យស្លន់ស្លោចំពោះវីរុសកូវីដបំប្លែងខ្លួន Omicron ឡើយ ព្រោះវាគឺជាធម្មជាតិនៃវដ្តជីវិតរបស់មេរោគ ។

កន្លងមកអង្គការសុខភាពពិភពលោក (WHO) ក៏ធ្លាប់បានអះអាងដែរថា ពិភពលោកមិនគួរភ័យស្លន់ស្លោចំពោះវីរុសបំប្លែងខ្លួនថ្មី Omicron នោះទេ ប៉ុន្តែគួរតែត្រៀមខ្លួនឲ្យបានល្អ ខណៈតាមការរកឃើញដំបូងបានបង្ហាញថា ករណីវីរុសកូវីដបំប្លែងខ្លួន Omicron ភាគច្រើនគឺ “ស្រាល” ។

យ៉ាងណា លោក Yong ក៏បានផ្ដល់ដំបូន្មានដល់មនុស្សឲ្យបន្តការពារខ្លួនពីវីរុសមួយនេះផងដែរ ក្រោយថៃរកឃើញករណី Omicron ដំបូងលើជនជាតិអាមេរិកម្នាក់ដែលធ្វើដំណើរពីប្រទេសអេស្ប៉ាញ កាលពីថ្ងៃទី៣០ ខែវិច្ឆិកា ឆ្លងកាត់ទីក្រុងឌូបៃតាមរយៈគម្រោងលើកលែងការធ្វើចត្តាឡីស័ក Test & Go ។

លោក Yong បាននិយាយថា ទោះវាជាធម្មជាតិនៃវដ្តជីវិតរបស់មេរោគក៏ដោយ លោកសូមជំរុញឲ្យប្រជាជនទៅ ចាក់វ៉ាក់សាំងកូវីដ និងអ្នកចាក់បានពេញលេញហើយ ត្រូវទៅ ចាក់ដូសជំរុញផងដែរ ។ លោកក៏រំឭកដល់មនុស្សឲ្យប្រកាន់ខ្ជាប់យ៉ាងតឹងរ៉ឹងនូវវិធានការបង្ការជំងឺកូវីដ ១៩ រួមទាំងការលាងដៃឲ្យបានញឹកញាប់ រក្សាទម្លាប់អនាម័យ ការពាក់ម៉ាស និងការរក្សាគម្លាតសង្គមជាដើម ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ ខុសពី WHO គ្រូពេទ្យជំនាញ ថៃ ប្រាប់តែ ៣ ក្បាច់ប៉ុណ្ណោះ Omicron មិនមកកៀក