ព័ត៌មានអន្ដរជាតិ

ទីប្រឹក្សាវេជ្ជសាស្ត្រកំពូលអាមេរិកអំពាវនាវឲ្យពលរដ្ឋប្រញាប់ចាក់ដូសទី៣ការពារ Omicron

បានផុស

៣ years មុន

នៅ

ថ្ងៃចន្ទ ១៣ ធ្នូ ២០២១

ដោយ

អ្នកជំនាញវេជ្ជសាស្ត្រកំពូលរបស់សហរដ្ឋអាមេរិក លោក Anthony Fauci នៅថ្ងៃអាទិត្យបានអំពាវនាវឲ្យពលរដ្ឋអាមេរិកប្រញាប់ទៅចាក់វ៉ាក់សាំងដូសទី៣ ខណៈពលរដ្ឋអាមេរិកបាត់បង់ជីវិតដោយសារជំងឺកូវីដ-១៩ឡើងជិតដល់៨០ម៉ឺននាក់ហើយ។

លោក Fauci បានព្រមានថា វីរុសបំប្លែងខ្លួនថ្មីទំនងជាអាចគេចផុតពីប្រសិទ្ធភាពការពាររបស់វ៉ាក់សាំងពីរដូសគឺវ៉ាក់សាំង Pfizer/BioNTech’s និង Moderna’s។ វីរុស Omicron កំពុងក្លាយជាការភ័យខ្លាចថ្មីដែលបានធ្វើឲ្យការឆ្លងនៅសហរដ្ឋអាមេរិកចាប់ផ្តើមកើនឡើងជាថ្មី ស្របពេលនឹងវីរុស Delta ក៏នៅតែរាតត្បាតខ្លាំងដដែល។

លោក Fauci មានប្រសាសន៍ថា ការចាក់វ៉ាក់សាំងដូសបន្ថែមផ្តល់ឲ្យនូវប្រសិទ្ធភាពការពារល្អបំផុតប្រឆាំងនឹង Omicron បើទោះជាគោលដៅផ្លូវការរបស់រដ្ឋាភិបាលអាមេរិកពីការចាក់វ៉ាក់សាំងពេញ២ដួសនៅមិនទាន់បានសម្រេច១០០%ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានវិទ្យាស្ថានជាតិអាឡែរហ្សី និងជំងឺឆ្លង ព្រមទាំងជាប្រធានទីប្រឹក្សាវេជ្ជសាស្ត្ររបស់លោកប្រធានាធិបតីអាមេរិកបានឲ្យដឹងថា ៖«ទិន្នន័យបឋមបង្ហាញថា នៅពេលយើងចាក់ដូសទី៣ វាកើនឡើងកម្រិតការពារខ្ពស់គ្រប់គ្រាន់ដែលអាចការពារបានល្អប្រឆាំងនឹង Omicron»។

លោកបន្តថា ៖«ហេតុផលមួយទៀតគឺដើម្បីលើកទឹកចិត្តអ្នកដែលមិនទាន់ចាក់វ៉ាក់សាំងឲ្យទៅចាក់វ៉ាក់សាំង ប៉ុន្តែជាពិសេស អ្នកដែលបានចាក់ដូសទី២ហើយប្រញាប់ទៅចាក់ដូសទី៣ដើម្បីឲ្យប្រសិទ្ធភាពការពារខ្លាំងដូចដើមវិញ។ ប្រសិនបើ អ្នកចង់មានជម្រើសការពារល្អ អ្នកពិតជាត្រូវការចាក់ដូសបន្ថែម»។

សូមបញ្ជាក់ថា បើទោះជាអត្រាចាក់វ៉ាក់សាំង ជាពិសេសដូសបន្ថែមបានកើនឡើងខ្លាំងប៉ុន្មានសប្តាហ៍នេះប្រហែលជា៤០%នៃពលរដ្ឋអាមេរិកពេញវ័យនៅមិនទាន់ចាក់បានពេញដូស និងបង្កើនចាក់កុមារអាយុ៥ដល់១១ឆ្នាំ ក៏អាមេរិកនៅស្ថិតក្រោមគោលដៅ២០%ទៀត។

ការបង្ហាញរបស់លោក Fauci ស្របគ្នាទៅនឹងចក្រភពអង់គ្លេសដែលបានរកឃើញកាលពីសប្តាហ៍មុនក្នុងការវិភាគថា វ៉ាក់សាំងពីរដូសមិនគ្រាប់គ្រាន់សម្រាប់ការពារវីរុសបំប្លែងខ្លួនថ្មី Omicron ឡើយពោលគឺទាល់តែ៣ដូសទើបមានប្រសិទ្ធភាពប្រមាណ៧៥%ប្រឆាំងនឹងវីរុសថ្មីនេះ។

អ្វីដែលគួរឲ្យកត់សំគាល់ទៀតនោះ អ្នកឆ្លងវីរុស Omicron ភាគច្រើននៅសហរដ្ឋអាមេរិកគឺជាអ្នកចាក់វ៉ាក់សាំងពេញដូស(២ដូស)រួចរាល់ហើយ។ ប្រការនេះមានន័យថា វីរុសថ្មីនេះអាចគេចផុតពីវ៉ាក់សាំងពីរដូសដែលទាមទារឲ្យចាក់៣ដូស៕

ប្រែសម្រួល៖ វីរបុត្រ
ប្រភព៖ theguardian