ខណៈប្រឈមមុខជាមួយ Omicron ប្រទេសនានាកំពុងធ្វើតាមវិធីសាស្ត្រប្រយុទ្ធកូវីដ របស់ ចិន

អ្នកជំនាញផ្នែករោគរាតត្បាតកំពូលរបស់ប្រទេសចិនបាននិយាយកាលពីចុងសប្តាហ៍ថា ប្រទេសជាច្រើនដែលចាត់វិធានការតឹងរ៉ឹងនៅពេលប្រឈមមុខនឹងវីរុសបំប្លែងខ្លួន Omicron កំពុងធ្វើតាមវិធីសាស្រ្តរបស់ចិន ក្នុងការប្រយុទ្ធប្រឆាំងនឹងជំងឺកូវីដ១៩។

លោក Zhong Nanshan បានប្រាប់វេទិកាវិទ្យាសាស្ត្រ Greater Bay ថា “ពិភពលោក កំពុងទទួលស្គាល់ជាបណ្តើរៗហើយ នូវវិធីសាស្រ្តរបស់ប្រទេសចិន ក្នុងការទប់ទល់នឹងមេរោគ អំឡុងការប្រយុទ្ធរយៈពេលពីរឆ្នាំប្រឆាំងនឹងជំងឺរាតត្បាត”។

លោកនិយាយថា ការស្រាវជ្រាវ និងការអភិវឌ្ឍន៍លើវ៉ាក់សាំង អង់ទីគ័រ និងថ្នាំព្យាបាលនៅតែមានភាពយឺតយ៉ាវនៅឡើយ ដោយសារតែខ្វះការយល់ដឹងអំពីប្រភពដើមនៃមេរោគ ភ្នាក់ងារកណ្តាល និងផ្លូវចម្លង។

លោក Zhong បានរំលឹកឡើងវិញថា ការចាក់ថ្នាំបង្ការ ឬការព្យាបាលផ្សេងទៀត គឺនៅតែចាំបាច់ ដើម្បីរក្សាការចម្លងនៅអត្រាទាប។ មានការប៉ាន់ប្រមាណថា ប្រទេសចិននឹងឈានដល់គោលដៅនៃភាពស៊ាំត្រឹមចុងឆ្នាំនេះ ខណៈប្រជាជន៨៣ភាគរយ បានទទួលវ៉ាក់សាំងពេញលេញរួចទៅហើយ។

អ្នកជំនាញផ្នែកសួតរូបនេះ ក៏បានលើកឡើងផងដែរអំពីវឌ្ឍនភាពចុងក្រោយបង្អស់ នៃថ្នាំព្យាបាលជំងឺកូវីដ១៩ ដំបូងបង្អស់របស់ប្រទេសចិនដែលមានឈ្មោះថា Brii Biosciences’ (Brii)។

លោក Zhong និយាយថា “ថ្នាំនេះ កំពុងដំណើរការ ខណៈអ្នកជំងឺកូវីដជាច្រើនដែលមានស្ថានភាពធ្ងន់ធ្ងរនៅក្នុងខេត្ត Yunnan, Qinghai និងកន្លែងផ្សេងទៀត មានប្រតិកម្មបានយ៉ាងល្អទៅនឹងថ្នាំនេះ”។

លើសពីនេះ លោកបានលើកឡើងថា ការអភិវឌ្ឍន៍ជាបន្តបន្ទាប់នៃឱសថថ្មីប្រឆាំងនឹងជំងឺកូវីដ១៩ និងកិច្ចខិតខំប្រឹងប្រែងរួមគ្នាពីប្រទេសផ្សេងៗ ក៏ត្រូវទាមទារផងដែរ ដើម្បីប្រយុទ្ធប្រឆាំងនឹងវីរុសនេះ៕

ប្រែសម្រួល៖ Vann Vann

ប្រភព៖ CGTN

ចុចអាន៖ Omicron ពិតជាឆ្លងខ្លាំងជាង Delta និងធ្វើឲ្យវ៉ាក់សាំង ថយប្រសិទ្ធភាពមែន