ជិតដល់ថ្ងៃចាក់វ៉ាក់សាំង បែរជាអង់គ្លេសប្រកាសថា មនុស្សអាយុលើស៨០ឆ្នាំភាគច្រើននឹងត្រូវរង់ចាំដល់ឆ្នាំក្រោយ

មន្រ្តីសុខាភិបាលកំពូលម្នាក់បាននិយាយថា មនុស្សភាគច្រើនដែលមានអាយុលើស៨០ឆ្នាំនៅក្នុងប្រទេសអង់គ្លេសនឹងត្រូវរង់ចាំរហូតដល់ឆ្នាំក្រោយទើបទទួលបានវ៉ាក់សាំងការពារវីរុសកូរ៉ូណា។

លោក Chris Hopson នាយកប្រតិបត្តិអង្គការ NHS Providers បាននិយាយថា មនុស្សភាគច្រើនដែលស្ថិតនៅលើគេក្នុងបញ្ជីអាទិភាពចាក់វ៉ាក់សាំងនឹងមិនទទួលបានការចាក់ថ្នាំបង្ការទេរហូតដល់ខែមករា កុម្ភៈឬមីនាឯណោះ។

លោក Hopson បាននិយាយថា ប្រជាជនចាំបាច់ត្រូវរង់ចាំហើយសូមធានាថា ប្រសិនបើពួកគេមិនបានទទួលលិខិតឬលេខទូរស័ព្ទទាក់ទងសម្រាប់ការហៅឲ្យមកចាក់វ៉ាក់សាំង ពួកគេមិនត្រូវបានគេបំភ្លេចចោលឡើយ។

លោកបន្តថា “ខ្ញុំមិនគិតថា មនុស្សគួរតែរំពឹងអ្វីគ្រប់យ៉ាងនៅប៉ុន្មានថ្ងៃខាងមុខនេះទេពីព្រោះការពិតគឺដូចអ្វីដែលខ្ញុំបាននិយាយអញ្ចឹង សម្រាប់មនុស្សភាគច្រើននឹងត្រូវបានចាក់វ៉ាក់សាំងនៅខែមករា កុម្ភៈឬមីនា។

ស្របពេលជាមួយគ្នានោះ សាស្រ្តាចារ្យ Stephen Powis នាយកផ្នែកវេជ្ជសាស្ត្រជាតិនៃ NHS បាននិយាយថា ការចែកចាយវ៉ាក់សាំងគឺជាធ្វើឡើងជាដំណាក់កាលមិនមែនសម្រុកទេ។

គួរបញ្ជាក់ថា ការចាក់ថ្នាំបង្ការនឹងត្រូវធ្វើឡើងនៅតាមមណ្ឌលសុខភាពរាប់សិបកន្លែងចាប់ពីថ្ងៃអង្គារទៅដែលថ្ងៃនេះត្រូវបានរដ្ឋមន្ត្រីក្រសួងសុខាភិបាល Matt Hancock ឲ្យឈ្មោះថា “V-Day”។​ 

មនុស្សចាស់អាយុ៨០ឆ្នាំឡើង បុគ្គលិកមណ្ឌលសុខភាពនិង NHS គឺជាក្រុមនឹងទទួលបានវ៉ាក់សាំងមុនគេ៕

ប្រែសម្រួលដោយ៖ Vann Vann

ប្រភព៖ Mirror

ចុចអាន៖ អង់គ្លេសបញ្ចេញវីដេអូដំបូងនៃវ៉ាក់សាំងដែលត្រៀមចាក់ឲ្យប្រជាជន ឃើញហើយរំភើបជំនួស

ចុចអាន៖ ឃើញហើយរំភើបណាស់! វ៉ាក់សាំងទាំងឡានៗត្រូវបានដឹកចេញពីរោងចក្រយកទៅកម្ចាត់ជំងឺកូវីដ១៩