តាលីបង់ កាត់ក្បាល និងព្យួរ.ក មនុស្សរាប់សិបនាក់ បង្ហាញសាកសព ជាសាធារណៈ

ឧត្តមស្នងការរងអង្គការសហប្រជាជាតិទទួលបន្ទុកសិទ្ធិមនុស្សលោកស្រី Nada Al-Nashif បាននិយាយនៅ ក្នុងសេចក្តីថ្លែងការណ៍មួយថា សមាជិកនៃក្រុមតាលីបង់បានសម្លាប់មនុស្សរាប់សិបនាក់តាមរយៈការកាត់ក្បាល និងព្យួរ.ក ក្នុងរយៈពេល ៤ ខែដែលពួកគេបានគ្រប់គ្រងប្រទេសអាហ្វហ្គានីស្ថាន ។

យោងតាមលោក Al-Nashif បានឲ្យដឹងថា ពលរដ្ឋ និងអតីតសមាជិកនៃកងកម្លាំងសន្តិសុខជាតិអាហ្វហ្គានីស្ថានជាង ១០០ នាក់ត្រូវបានសម្លាប់ ចាប់តាំងពីពាក់កណ្តាលខែសីហា ដោយយ៉ាងហោចណាស់ ៧២ នាក់នៃការសម្លាប់ទាំងនោះធ្វើឡើងដោយសមាជិកនៃក្រុមនេះ ។

ទន្ទឹមនោះ យ៉ាងហោចណាស់ជនរងគ្រោះ ៥០ នាក់ទៀតនៃការសម្លាប់ក្រៅ ប្រព័ន្ធតុលាការរបស់តាលីបង់គឺជាសមាជិកនៃក្រុម ISIS-K ជាក្រុមបំបែកខ្លួននៃអង្គការភេរវករដ៏ល្បីល្បាញដែលទទួលខុសត្រូវចំពោះការទម្លាក់គ្រាប់បែកជាច្រើននៅទូទាំងប្រទេសអាហ្វហ្គានីស្ថាន រួមទាំងការបំផ្ទុះដ៏សាហាវនៅ អាកាសយានដ្ឋានកាប៊ុលក្នុងខែសីហា ។

ជាចុងក្រោយលោកស្រីបញ្ជាក់ថា “នៅ ក្នុងករណីជាច្រើន សាកសពត្រូវបានបង្ហាញជាសាធារណៈ ហើយក្នុងនោះសកម្មជនអាហ្វហ្គានីស្ថាន ៨ នាក់ និងអ្នកកាសែត ២ នាក់ក៏ត្រូវបានសម្លាប់ផងដែរ ចាប់តាំងពីក្រុមតាលីបង់ឡើងកាន់អំណាចនៅ ថ្ងៃទី ១៥ ខែសីហា” ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តាលីបង់ បញ្ជាឲ្យប៉ុស្តិ៍ទូរទស្សន៍បញ្ឈប់ការចាក់ផ្សាយរឿងណាដែលមាន តួស្រី