លោក​ ចូ​ បៃដិន​ ជ្រើស​រើស​ស្ត្រីពីរ​រូប​ជា​ឯក​អគ្គរដ្ឋ​ទូត​ប្រចាំអូស្ត្រាលី​ និង​បេលីស

កូនស្រីរបស់អតីតប្រធានាធិបតីអាមេរិក Jonh F. Kennedy គឺលោកស្រី Caroline Kennedy ត្រូវបានលោកប្រធានាធិបតី ចូ បៃដិន ជ្រើសរើសជាឯកអគ្គរដ្ឋទូតអាមេរិកប្រចាំនៅប្រទេសអូស្ត្រាលី និងកីឡាការិនីជិះស្គីសម្តែងលើទឹកក Michelle Kwan ជាឯកអគ្គរដ្ឋទូតអាមេរិកប្រចាំប្រទេសបេលីស។

លោកស្រី Kennedy អាយុ៦៤ឆ្នាំជាកូនស្រីរបស់លោក John Kennedy អតីតប្រធានាធិបតីអាមេរិកទី៣៥ដែលត្រូវបានគេធ្វើឃាតក្នុងឆ្នាំ១៩៦៣។ លោកស្រីធ្លាប់ធ្វើជាឯកអគ្គរដ្ឋទូតអាមេរិកប្រចាំប្រទេសជប៉ុនពីឆ្នាំ២០១៣ដល់២០១៧ក្រោមអណត្តិប្រធានាធិបតីលោក បារ៉ាក់ អូបាម៉ា។

ចំណែកលោកស្រី Kwan អាយុ៤១ឆ្នាំជាម្ចាស់មេដាយប្រាក់អូឡាំពិក២គ្រឿងសម្រាប់កីឡាជិះស្គីសម្តែងលើទឹកកក។ លោកស្រីធ្លាប់បំពេញតួនាទីជាទីប្រឹក្សាក្រសួងការបរទេសអាមេរិកទទួលបន្ទុកលើកិច្ចនារី។

អូស្ត្រាលីជាសម្ព័ន្ធមិត្តសំខាន់មួយរបស់អាមេរិក ហើយទំនាក់ទំនងរបស់ពួកគេកាន់តែពង្រឹងឡើងដើម្បីឆ្លើយតបនឹងឥទ្ធិពលកំពុងកើនឡើងរបស់ចិន។

បទពិសោធរបស់លោកស្រី Kennedy នៅជប៉ុននឹងមានប្រយោជន៍ដល់ទីក្រុងកង់បេរ៉ាដែលផ្តល់ឲ្យអូស្ត្រាលី និងជប៉ុនដែលប្រទេសទាំងពីរជាអ្វីដែលហៅក្រុម Quad រាប់ទាំងអាមេរិក និងឥណ្ឌាផង ចំពោះការពង្រីកកិច្ចសហប្រតិបត្តិការដើម្បីប្រឈមនឹងការកើនឡើងឥទ្ធិពលរបស់ចិន។

ក្នុងខែកញ្ញា អាមេរិក អង់គ្លេស និងអូស្ត្រាលីបានប្រកាសសន្ធិសញ្ញាការពារជាតិហៅថា AUKUS ដែលនឹងជួយអូស្ត្រាលីឲ្យទទួលបាននាវាមុជទឹកដើរដោយថាមពលនុយក្លេអ៊ែររបស់អាមេរិក និងពង្រីកសន្តិសុខរបស់ខ្លួនឈានដល់តំបន់ឥណ្ឌូ-ប៉ាស៊ីហ្វិក។

លោកស្រី Kennedy ជាឯកអគ្គរដ្ឋទូតស្ត្រីដំបូងរបស់អាមេរិកប្រចាំនៅជប៉ុន។ លោកស្រីមានជំនាញមេធាវី និងជាអ្នកនិពន្ធសៀវភៅស្តីពីសេរីភាពស៊ីវិល ព្រមទាំងជាអ្នកជំនាញកំណាព្យផងដែរ។

ទោះបីជាយ៉ាងណា គេមិនទាន់ច្បាស់ទេថានៅពេលណាដែលលោកស្រី Kennedy ត្រូវបានប្រកាសកាន់តំណែងនេះជាផ្លូវការពីព្រោះត្រូវការអនុម័តពីព្រឹទ្ធសភាជាមុនសិន។ សមាជិកព្រឹទ្ធសភាគណបក្សសាធារណៈជាច្រើនបានកំពុងរារាំងពីការជ្រើសរើសបេក្ខភាពរបស់លោកបៃដិន ដូចជាលោក Nicholas Burns ជាឯកអគ្គរដ្ឋទូតអាមេរិកប្រចាំនៅប្រទេសចិនជាដើមចាប់តាំងពីខែសីហាមក៕

ប្រែសម្រួល៖ វីរបុត្រ
ប្រភព៖ reuters