ព័ត៌មានអន្ដរជាតិ

លោក ស៊ី ជីនពីង គាំទ្រ ពូទីន ប្រឆាំង អាមេរិក អង្គការណាតូ និងអ៊ុយក្រែន (មានវីដេអូ)

បានផុស

៣ years មុន

នៅ

ថ្ងៃព្រហស្បតិ៍ ១៦ ធ្នូ ២០២១

ដោយ

ក្នុងអំឡុងពេលនៃកិច្ចប្រជុំកំពូលតាមវីដេអូខលរវាងមេដឹកនាំទាំងពីរកាលពីថ្ងៃពុធ ប្រធានាធិបតីចិនលោក ស៊ី ជីនពីង បានគាំទ្រនឹងការទទូចរបស់សមភាគីរុស្ស៊ីលោក វ្ល៉ាឌីមៀ ពូទីន ដែលថា អង្គការណាតូ (NATO) ធានានឹងមិនពង្រីក ឬដាក់បន្ថែមកងទ័ពទៅ អ៊ុយក្រែន និងដាក់អាវុធនៅ ក្នុងប្រទេសនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីប្រឹក្សាកិច្ចការបរទេសរបស់លោក ពូទីន គឺលោក Yuri Ushakov បានឲ្យដឹងថា មេដឹកនាំរុស្ស៊ី និងចិនបានពិភាក្សាអំពី “ការគំរាមកំហែងកាន់តែខ្លាំងឡើងចំពោះផលប្រយោជន៍ជាតិរបស់រុស្ស៊ីពីសហរដ្ឋអាមេរិក និងប្លុកណាតូ ដែលតែងតែផ្លាស់ប្តូរហេដ្ឋារចនាសម្ព័ន្ធយោធារបស់ពួកគេនៅ ជិតព្រំដែនរុស្ស៊ី” ។

លោក Ushakov បានបន្ថែមថា លោក ពូទីន បានប្រាប់លោក ស៊ី អំពីតម្រូវការក្នុងការចរចាជាមួយអង្គការណាតូ និងសហរដ្ឋអាមេរិក ជុំវិញការធានាសន្តិសុខ ហើយលោក ស៊ី បានឆ្លើយតបថា លោកយល់អំពីកង្វល់របស់រុស្ស៊ី និងគាំទ្រយ៉ាងពេញទំហឹងនូវគំនិតផ្តួចផ្តើមរបស់យើងក្នុងការអនុវត្តការធានាសន្តិសុខទាំងនេះសម្រាប់រុស្ស៊ី ។

ទន្ទឹមនោះ ទីភ្នាក់ងារសារព័ត៌មានរដ្ឋរបស់ចិន Xinhua បានរាយការណ៍ថា លោក ស៊ី បានសង្កត់ធ្ងន់លើតម្រូវការសម្រាប់ទីក្រុងម៉ូស្គូ និងទីក្រុងប៉េកាំង ដើម្បីការពារផលប្រយោជន៍សន្តិសុខរបស់ពួកគេ ។

ដោយដកស្រង់សម្ដីពី Xinhua លោក ស៊ី បាននិយាយថា “នាពេលបច្ចុប្បន្ននេះ កងកម្លាំងអន្តរជាតិមួយចំនួនដែលស្ថិតក្រោមការក្លែងបន្លំនៃ “លទ្ធិប្រជាធិបតេយ្យ” និង “សិទ្ធិមនុស្ស” កំពុងជ្រៀតជ្រែកចូលកិច្ចការផ្ទៃក្នុងរបស់ប្រទេសចិន និងរុស្ស៊ី ហើយបានជាន់ឈ្លីយ៉ាងព្រៃផ្សៃលើច្បាប់អន្តរជាតិ និងបទដ្ឋាននៃទំនាក់ទំនងអន្តរជាតិដែលត្រូវបានទទួលស្គាល់ ។

ស្របពេលជាមួយគ្នានេះ មេដឹកនាំទាំងពីរហាក់ដូចជាបានបង្រួបបង្រួមទំនាក់ទំនង បន្ទាប់ពីសហរដ្ឋអាមេរិកបានដាក់ទណ្ឌកម្មលើប្រទេសចិនចំពោះការបង្រ្កាបរបស់ខ្លួនលើប្រជាជនមូស្លីមអ៊ុយហ្គ័រ និងរុស្ស៊ីជុំវិញការបញ្ចូលឧបទ្វីបគ្រីមៀដោយខុសច្បាប់ក្នុងឆ្នាំ ២០១៤ ។

បន្ថែមពីនេះ លោក ពូទីន បានប្រាប់លោក ស៊ី ថា “គំរូថ្មីនៃកិច្ចសហប្រតិបត្តិការត្រូវបានបង្កើតឡើងរវាងប្រទេសរបស់យើង ដោយផ្អែកលើគោលការណ៍ផ្សេងទៀត ដូចជាការមិនជ្រៀតជ្រែកក្នុងកិច្ចការផ្ទៃក្នុង និងការគោរពផលប្រយោជន៍គ្នាទៅ វិញទៅ មក” ។

វិមានក្រឹមឡាំងបានបដិសេធម្តងហើយម្តងទៀតថា ខ្លួនមិនមានផែនការសកម្មភាពយោធាប្រឆាំងនឹងអ៊ុយក្រែននោះទេ បន្ទាប់ពីមន្រ្តីអាមេរិកបានព្រមានសម្ព័ន្ធមិត្តថា ការឈ្លានពានណាមួយអាចកើតឡើងភ្លាមៗនៅ ដើមឆ្នាំក្រោយ ។

គួរបញ្ជាក់ថា លោក ពូទីន និងលោក ស៊ី បានរៀបកិច្ចប្រជុំនេះឡើង ចំពេលមានភាពតានតឹងកាន់តែខ្លាំងឡើងរវាងទីក្រុងមូស្គូ និងទីក្រុងវ៉ាស៊ីនតោន ជុំវិញការកសាងកងទ័ពរុស្ស៊ីរាប់ពាន់នាក់នៅ ព្រំដែនអ៊ុយក្រែន ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ New York Post

ចុចអាន ៖ ជួបគ្នាតាមវីដេអូ លោក ពូទីន សរសើរគំរូទំនាក់ទំនងរុស្ស៊ី-ចិន