សហភាពអឺរ៉ុប និង ណាតូ ព្រមានទៅ រុស្ស៊ី កុំឈ្លានពាន អ៊ុយក្រែន

សហភាពអឺរ៉ុប (EU) និងសម្ព័ន្ធមិត្តណាតូ (NATO) បានព្រមានរុស្ស៊ីកុំឲ្យចាត់វិធានការឈ្លានពានណាមួយប្រឆាំងនឹងអ៊ុយក្រែន ហើយបានជំរុញឲ្យក្រុងម៉ូស្គូកាត់បន្ថយភាពតានតឹង ។

ការបង្កើនកងទ័ពដ៏ធំរបស់រុស្ស៊ីនៅ តាមព្រំដែនរបស់ខ្លួនជាមួយអ៊ុយក្រែន កំពុងបង្កឲ្យមានការព្រួយបារម្ភនៅ ក្នុងសហភាពអឺរ៉ុប ដែលចាត់ទុកអតីតសាធារណរដ្ឋសូវៀតមួយនេះជាដៃគូយុទ្ធសាស្ត្រជិតស្និទ្ធ ដោយសារតែសមាជិកសហភាពអឺរ៉ុបមួយចំនួនក៏មានព្រំដែនជាមួយអ៊ុយក្រែនផងដែរ ។

ក្រោយជួបអ្នកសារព័ត៌មាន បន្ទាប់ពីកិច្ចប្រជុំរបស់មេដឹកនាំសហភាពអឺរ៉ុបកាលពីថ្ងៃព្រហស្បតិ៍ ប្រធានក្រុមប្រឹក្សាអ៊ឺរ៉ុបលោក Charles Michel បាននិយាយថា “រាល់ការឈ្លានពានយោធាបន្ថែមទៀតប្រឆាំងនឹងអ៊ុយក្រែននឹងមានផលវិបាកដ៏ធំ ហើយក៏នឹងមានការឆ្លើយតបយ៉ាងធ្ងន់ធ្ងរទៅ វិញផងដែរ” ។

ទន្ទឹមនោះអង្គការណាតូក៏បានចេញសេចក្តីថ្លែងការណ៍ស្រដៀងគ្នានេះផងដែរតាមរយៈក្រុមប្រឹក្សាអាត្លង់ទិកខាងជើង ដែលធ្វើសេចក្តីសម្រេចរបស់ខ្លួនកាលពីថ្ងៃព្រហស្បតិ៍ ។

ណាតូបាននិយាយថា សម្ព័ន្ធភាពនឹងឆ្លើយតបជានិច្ចក្នុងវិធីដែលបានកំណត់ចំពោះការថយចុះនៃបរិយាកាសសន្តិសុខរបស់ខ្លួន ហើយបានជំរុញឲ្យរុស្ស៊ីចាត់វិធានការភ្លាមៗដើម្បីកាត់បន្ថយភាពតានតឹងនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ស៊ី ជីនពីង គាំទ្រ ពូទីន ប្រឆាំង អាមេរិក អង្គការណាតូ និងអ៊ុយក្រែន (មានវីដេអូ)