មនុស្សស្លាប់កើនដល់ ៣៣នាក់ ដោយសារព្យុះទីហ្វុងខ្លាំងបំផុតនៅ ហ្វីលីពីន

មនុស្សចំនួន ៣៣នាក់ ត្រូវបានសម្លាប់ដោយសារព្យុះទីហ្វុងដ៏ខ្លាំងបំផុត ដែលវាយប្រហារប្រទេស ហ្វីលីពីន ក្នុងឆ្នាំនេះ។ នេះបើយោងតាមតួលេខផ្លូវការកាលពីថ្ងៃសៅរ៍ទី ១៨ ខែធ្នូ។

ស្របពេលជាមួយគ្នានោះ មនុស្សជាង ៣០ម៉ឺននាក់ បានភៀសខ្លួនចេញពីផ្ទះសម្បែង និងរមណីយដ្ឋានមាត់សមុទ្រ ខណៈព្យុះទីហ្វុង Rai វាយលុកតំបន់ភាគខាងត្បូង និងកណ្តាលនៃប្រទេសប្រជុំកោះមួយនេះ ដោយកាត់ផ្តាច់ទំនាក់ទំនង និងចរន្តអគ្គិសនីនៅក្នុងតំបន់ជាច្រើន។

Rai គឺជាព្យុះទីហ្វុងដ៏ខ្លាំងមួយ នៅពេលវាបោកបក់ចូលកោះទេសចរណ៍ដ៏ពេញនិយម Siargao កាលពីថ្ងៃព្រហស្បតិ៍ ដោយនាំមកជាមួយនូវល្បឿនខ្យល់អតិបរមា ១៩៥គីឡូម៉ែត្រក្នុងមួយម៉ោង។

ល្បឿនខ្យល់របស់ Rai បានថយចុះមកត្រឹម ១៥០គីឡូម៉ែត្រក្នុងមួយម៉ោង នៅពេលវាវាយប្រហារទូទាំងប្រទេស បង្កឲ្យមានភ្លៀងធ្លាក់យ៉ាងគំហុក ដែលបានជន់លិចភូមិនានា ផ្តួលរំលំដើមឈើ និងបំផ្លាញសំណង់នានា។

ព្យុះនេះបានលេចឡើងនៅសមុទ្រចិនខាងត្បូងកាលពីថ្ងៃសៅរ៍ ហើយកំពុងធ្វើដំណើរឆ្ពោះទៅប្រទេសវៀតណាម៕

ប្រែសម្រួល៖ សន្យា

ប្រភព៖ CNA

ចុចអាន៖ WHO ចុះបញ្ជីវ៉ាក់សាំងទី ២ របស់ឥណ្ឌា ប្រើប្រាស់ជាបន្ទាន់

ចុចអាន៖ ព្យុះទីហ្វុង Rai ចាប់ផ្តើមសម្លាប់មនុស្សនៅ ហ្វីលីពីន