បង្ហាញមុខលើកនេះប្អូនស្រី គីម ជុងអ៊ុន អាចឡើងឋានៈខ្ពស់ជាងមុន

លោកស្រី គីម យ៉ូជុង ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងលោក គីម ជុងអ៊ុន អាចត្រូវបានតម្លើងឋានៈខ្ពស់ជាងមុន ។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយកូរ៉េខាងជើង ។

លោកស្រី គីម យ៉ូជុង ត្រូវបានដាក់ក្នុងបញ្ជីក្នុងចំណោមសមាជិក ៨ នាក់នៃការិយាល័យនយោបាយ ជាមួយសមាជិកជំនួសផ្សេងទៀត ដែលបង្ហាញថា លោកស្រីប្រហែលជាត្រូវបានគេជាប់ឈ្មោះជាសមាជិក ឬសមាជិកជំនួសនៃគណៈកម្មាធិការនេះ ។

ទន្ទឹមនោះ ទីភ្នាក់ងារសារព័ត៌មានកូរ៉េ (KCNA) បានរាយការណ៍ថា នៅ ក្នុងព្រឹត្តិការណ៍រំលឹកវិញ្ញាណក្ខន្ធអតីតមេដឹកនាំលោក គីម ជុងអ៊ីល ដែលបានធ្វើឡើងកាលពីថ្ងៃសុក្រ ទី១៧ ខែធ្នូ លោកស្រី គីម យ៉ូជុង ក៏ត្រូវបានគេឃើញចូលរួមក្នុងពិធីនេះជាមួយនឹងសមាជិកការិយាល័យនយោបាយនៃគណៈកម្មាធិការកណ្ដាលរបស់គណបក្សពលករ ។

នៅ ក្នុងការផ្សាយនៃពិធីរំលឹកវិញ្ញាណក្ខន្ធដោយទូរទស្សន៍រដ្ឋកូរ៉េខាងជើងកាលពីថ្ងៃសុក្រ លោកស្រី គីម យ៉ូជុង ក៏ត្រូវបានគេឃើញឈរក្បែរលោក Kim Yong-chol និងសមាជិកការិយាល័យនយោបាយ ២ នាក់ផ្សេងទៀត ។

គួរបញ្ជាក់ថា បច្ចុប្បន្នលោកស្រី គីម យ៉ូជុង គឺជាសមាជិកនៃគណៈកម្មការកិច្ចការរដ្ឋ និងជាអនុប្រធាននាយកដ្ឋាននៃគណៈកម្មាធិការកណ្តាលនៃគណបក្សពលករ ហើយលោកស្រីក៏ធ្លាប់ធ្វើជាសមាជិកជំនួសនៃការិយាល័យនយោបាយដ៏មានឥទ្ធិពលនេះផងដែរ ប៉ុន្តែត្រូវបានទម្លាក់ពីតំណែងនៅ ក្នុងសមាជបក្សមួយក្នុងខែមករា ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ កូរ៉េខាងជើង ហាមមិនឲ្យប្រជាជនសើច និង​ផឹកស្រា ក្នុងខួប ១០ ឆ្នាំមរណភាពឪពុក គីម ជុងអ៊ុន (មានវីដេអូ)