សភាពអឺរុប នឹងពិចារណាជួយក្រសួងយុត្តិធម៌ ក្នុងការអនុវត្តកម្មវិធីកំណែទម្រង់ប្រព័ន្ធយុត្តិធម៌ – Kampuchea Thmey Daily
Connect with us

ព័ត៌មានអន្ដរជាតិ

សភាពអឺរុប នឹងពិចារណាជួយក្រសួងយុត្តិធម៌ ក្នុងការអនុវត្តកម្មវិធីកំណែទម្រង់ប្រព័ន្ធយុត្តិធម៌

Published

on

នេះជាការការលើកឡើងរបស់លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ ក្រោយពីជំនួបរវាងលោក កើត រិទ្ធ រដ្ឋមន្ត្រីក្រសួងយុត្តិធម៌ ជាមួយប្រតិភូសហភាព អឺរ៉ុប ដឹកនាំដោយលោកស្រី Carmen MORENO ឯកអគ្គរដ្ឋទូត នៃសហភាពអឺរ៉ុបប្រចាំកម្ពុជា។

លោក ជិន ម៉ាលីន បានថ្លែងប្រាប់កម្ពុជាថ្មីនៅរសៀលថ្ងៃទី២៤ ខែតុលា ឆ្នាំ២០២០នេះថា នៅក្នុងជំនួបនោះ បានជជែកគ្នាអំពីលទ្ធផល នៃកិច្ចសហប្រតិបត្តិការរវាងសហភាពអឺរ៉ុប ជាមួយកម្ពុជានាពេលកន្លងមក និងអ្វីដែលត្រូវធ្វើជាមួយគ្នានាពេលខាងមុខ ទាក់ទងទៅដល់ការកែទម្រង់ច្បាប់ និងប្រព័ន្ធយុត្តិធម៌នៅកម្ពុជា។

បើតាមលោកជិន ម៉ាលីន អ្វីដែលធ្លាប់ធ្វើជាមួយគ្នាកន្លងមក រវាងសហភាពអឺរ៉ុបជាមួយកម្ពុជានោះ គឺមានលទ្ធផលល្អ ជាការអនុវត្តគម្រោងជំនួយផ្នែកច្បាប់ ដែលមានការបណ្ដុះបណ្ដាលមន្ត្រីនគរបាលយុត្តិធម៌ មន្ត្រីតុលាការ ការរៀបចំទិន្ន័យសំណុំរឿងតាមប្រព័ន្ធកុំព្យូទ័រ នៅតាមតុលាការជាដើម ហើយនៅពេលនេះសហគមន៍អឺរ៉ុប ក៏បានជួយដល់ក្រសួងយុត្តិធម៌លើការរៀបចំយន្តការដោះស្រាយវិវាទក្រៅប្រព័ន្ធតុលាការផងដែរ ហើយទៅថ្ងៃមុខសហភាពអឺរ៉ុបនឹងពិចារណាជួយក្រសួងយុត្តិធម៌លើធនធានមនុស្ស គឺការពង្រឹងសមត្ថភាពរបស់មន្ត្រីនៅតាមក្រសួង ក៏ដូចជាតុលាការ រួមទាំងការរៀបចំយន្តការ និងការរៀបចំតាក់តែងច្បាប់ ដើម្បីឲ្យមានគុណភាពល្អ ដើម្បីធានាដល់គោលការណ៍ប្រជាធិបតេយ្យ និងនីតិរដ្ឋនៅកម្ពុជា។

បើតាមលោក ជិន ម៉ាលីន នៅក្នុងជំនួបនោះ លោកកើត រិទ្ធ ក៏បានរៀបរាប់អំពីវឌ្ឍនភាពក្នុងវិស័យយុត្តិធម៌ នាពេលកន្លងមកផងដែរ និងការងារអទិភាពមួយចំនួន ដែលក្រសួងបានដាក់ចេញក្រោមការដឹកនាំរបស់លោក កើត រិទ្ធ ដែលជារដ្ឋមន្ត្រីក្រសួងយុត្តិធម៌ និងទិសដៅ ដែលត្រូវធ្វើទៅមុខទៀត។

ជាការឆ្លយតប លោកស្រី Carmen MORENO បានសម្ដែងការរីករាយចំពោះ និងកោតសរសើរចំពោះពីសមិទ្ធផល ដែលធ្វើបានកន្លងមក ហើយសហភាពអឺរុប នឹងពិចារណានូវលទ្ធភាព ក្នុងការធ្វើកិច្ចសហប្រតិបត្តិការដល់ក្រសួងយុត្តិធម៌ ក្នុងការអនុវត្តកម្មវិធីកំណែទម្រង់ប្រព័ន្ធយុត្តិធម៌ទៅថ្ងៃមុខទៀត

សូមជំនួបរវាងលោក កើត រិទ្ធ និងលោកស្រី Carmen MORENO បានធ្វើឡើងកាលពីរសៀលថ្ងៃសុក្រ ទី២៣ ខែតុលា ឆ្នាំ២០២០ នៅទីស្តីការក្រសួងយុតិ្តធម៌។ នៅក្នុងកិច្ចជំនួបនោះ ភាគី ទាំងពីរបានវាយតម្លៃខ្ពស់ លើកិច្ចសហប្រតិបតិ្តការ រវាងភាគីទាំងពីរនាពេលកន្លងមក និងបានពិភាក្សាអំពីការបន្តពង្រឹងកិច្ចសហប្រតិបតិ្តការទ្វេភាគី និងអំពីលទ្ធភាពដែលសហភាពអឺរ៉ុបប្រចាំកម្ពុជា អាចជួយដល់កម្ពុជា ជាពិសេសជួយដល់ក្រសួងយុតិ្តធម៌ លើការរៀបចំយន្តការដោះស្រាយវិវាទក្រៅប្រព័ន្ធតុលាការ ការបណ្តុះបណ្តាលធនធានមនុស្ស ក្នុងវិស័យច្បាប់ និងយុតិ្តធម៌ជាដើម៕
ដោយ ៖ កោះកែវ

ចុច Like Facebook កម្ពុជាថ្មី

ព័ត៌មានពេញនិយម