ខ្វះពីរបីម៉ោងចាប់ផ្ដើមមង្គលការ កូនក្រមុំតេស្តវិជ្ជមានកូវីដ១៩ បង្ខំចិត្តរៀបពិធីដោយស្លៀកពាក់ខោអាវពេទ្យ

ក្រោយពីកូនក្រមុំតេស្តវិជ្ជមាន Covid-19 តែប៉ុន្មានម៉ោងមុនពិធីចាប់ផ្ដើម មង្គលការមួយត្រូវបង្ខំរៀបចំឡើង ដោយតម្រូវឲ្យកូនកំលោះក្រមុំស្លៀកពាក់ខោអាវពេទ្យដើម្បីប្រារព្ធពិធីបញ្ចប់។

កាលពីថ្ងៃអាទិត្យទី ៦ ខែធ្នូ  ពិធីអាពាហ៍ពិអាពាហ៍មួយត្រូវបានរៀបចំទាំងកូនក្រមុំមានផ្ទុកវីរុសកូវីដ១៩ នាភូមិដាច់ស្រយាល បារ៉ាន ក្នុងរដ្ឋ Rajasthan ភាគខាងជើងប្រទេសឥណ្ឌា។

ជំនួសឲ្យការស្លៀកសម្លៀកបំពាក់អាពាហ៍ពិពាហ៍ពណ៌ក្រហមនៅពីមុខភ្លើងបរិសុទ្ធនៃប្រពៃណីឥណ្ឌា កូនក្រមុំនិងកូនកំលោះបានផ្លាស់ប្តូរសម្លៀកបំពាក់ដោយស្លៀកឈុតសលាយពណ៌ខៀវ ជាមួយរបាំងមុខ និងពាក់ម៉ាស។ រីឯអាចារ្យស្លៀកពាក់ដូចពួកអវកាសយានិក ឈរសូត្រខគម្ពីរបស់ជំនឿហិណ្ឌូ ដែលអមដោយចម្រៀងអាពាហ៍ពិពាហ៍បែបប្រពៃណីផងដែរ។

មន្ត្រីសុខាភិបាលលោក Rajendra Meena បានប្រាប់ទៅទីភ្នាក់ងារសារព័ត៌មានរ៉យទ័រថា កូនក្រមុំត្រូវបានតេស្តវិជ្ជមានកូវីដ១៩ ពីរបីម៉ោងមុនពិធីមង្គលការចាប់ផ្ដើម ដូច្នេះជម្រើសសាម៉ីខ្លួនទាំងពីរ គឺសម្រេចចិត្តរៀបចំពិធីឲ្យចប់សព្វគ្រប់។

មន្ត្រីដដែលបន្តថា ក្រោយរកឃើញកូនក្រមុំមានផ្ទុកវីរុសកូវីដ១៩ អាជ្ញាធរបានពិគ្រោះយោបល់ជាមួយក្រុមគ្រួសារសាម៉ីខ្លួន ហើយពួកគេយល់ព្រមរៀបការនៅមណ្ឌលផ្តាច់ឆ្ងាយពីភូមិ ដោយគ្មានការធ្វើពិធីសាសនាឲ្យបានគ្រប់ជ្រុងជ្រោយឡើយ។ បន្ទាប់ពីពិធីចប់ ទាំងកូនក្រមុំនិងកូនកំលោះត្រូវបានគេដាក់ឲ្យនៅដាច់ដោយឡែក។

បច្ចុប្បន្ន ឥណ្ឌាជាប្រទេសមានអ្នកឆ្លងនិងស្លាប់ខ្ពស់ជាងគេលំដាប់ទី ២ លើពិភពលោកបន្ទាប់ពីសហរដ្ឋអាមេរិក ដោយមានករណីសរុបជាង ៩.៦ លានករណី៕

ប្រែសម្រួល៖ សន្យា

ប្រភព៖ CNN

ចុចអាន៖ លោកយាយអាយុ៩០ឆ្នាំក្លាយជាមនុស្សដំបូងគេក្នុងលោកដែលទទួលបានវ៉ាក់សាំងកូវីដនៅ អង់គ្លេស

ចុចអាន៖ លម្អិតអំពីវ៉ាក់សាំងធំៗទាំង៤ដែលជាក្តីសង្ឃឹមរបស់ពិភពលោក យកឈ្នះជំងឺកូវីដ១៩