ប្រុងប្រយ័ត្ន! ករណីឆ្លងអូមីក្រុងក្នុងសហគមន៍ថៃ រាលដាលមកដល់ខេត្តជាប់ព្រំដែន កម្ពុជាហើយ

មជ្ឈមណ្ឌលព័ត៌មានកូវីដប្រចាំខេត្ត Surin បានឲ្យដឹងនៅក្នុង Facebook របស់ខ្លួនកាលពីថ្ងៃអាទិត្យទី ២៦ខែធ្នូថា មានការឆ្លងវីរុសកូវីដបំប្លែងខ្លួន អូមីក្រុង ចំនួនបីករណី ត្រូវបានរកឃើញនៅក្នុងស្រុក Kap Choeng ខណៈមនុស្ស ៤៩នាក់ មានហានិភ័យខ្ពស់នៃការឆ្លងមេរោគនេះ។

Surin គឺជាខេត្តមួយក្នុងចំណោមខេត្តទាំង ៧៧របស់ប្រទេសថៃ។ ខេត្តនេះ​ស្ថិត​នៅ​ភាគ​ឦសាន​ ​ប្រទេស​ថៃ​ ហើយភាគខាងត្បូង ជាប់នឹងខេត្តឧត្តរមានជ័យនៃប្រទេសកម្ពុជា។

ករណី អូមីក្រុង ទី១គឺជាបុរសអាយុ១៦ឆ្នាំម្នាក់ដែលបានទៅមើលការប្រគំតន្ត្រីស្រាបៀរ Chang កាលពីថ្ងៃទី១៥និង១៧ខែធ្នូ ដែលបណ្តាលឲ្យមនុស្ស៣០នាក់មានហានិភ័យខ្ពស់នៃការឆ្លង ហើយមនុស្ស២១នាក់មានហានិភ័យទាប។

ករណី អូមីក្រុង ទី២ និងទី៣ គឺជាស្ត្រីអាយុ៤០ឆ្នាំ និងបុរសអាយុ ៥៨ឆ្នាំ ដែលវិលត្រឡប់មកពីប្រទេសដាណឺម៉ាក ហើយបានទៅរស់នៅក្នុងស្រុក Kap Choeng ដែលបណ្តាលឲ្យមនុស្ស ១៩នាក់មានហានិភ័យខ្ពស់នៃការឆ្លង និងមនុស្ស២នាក់មានហានិភ័យទាប។

គួរបញ្ជាក់ថា ករណីជំងឺកូវីដ១៩សរុបនៅក្នុងខេត្តនេះ មានចំនួន ១៨,៩៤៤ ករណី ហើយមានអ្នកស្លាប់ ៨០ នាក់ ខណៈអ្នកជំងឺ ១៨,៧៦៩ នាក់បានជាសះស្បើយ និងអនុញ្ញាតឲ្យចាកចេញពីមន្ទីរពេទ្យ៕

ប្រែសម្រួល៖ Vann Vann

ប្រភព៖ Nation

ចុចអាន៖ បាងកក គ្រោងចាក់វ៉ាក់សាំងដូសទី ៤ លើក្រុមមនុស្ស ២ ប្រភេទ ការពារ Omicron