ពលរដ្ឋចិន ត្អូញត្អែរប្រឈមការអត់ឃ្លានដល់ស្លាប់ ដោយសារវិធានការរឹតត្បិតកូវីដ

ដោយសារតែវិធានការកូវីដថ្មីដ៏តឹងរ៉ឹង ប្រជាពលរដ្ឋដែលជាប់ក្រោមការបិទខ្ទប់នៅក្នុងទីក្រុងធំបំផុតមួយរបស់ប្រទេសចិន បាននិយាយថា ពួកគេប្រឈមការអត់ឃ្លាននៅក្នុងផ្ទះ បន្ទាប់ពីពួកគេត្រូវបានហាមឃាត់មិនឲ្យចេញទៅខាងក្រៅសូម្បីតែទៅទិញអាហារក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមន្ត្រីគ្រប់គ្រងទីក្រុង Xi’an កាលពីដើមសប្តាហ៍នេះ បានប្រាប់មនុស្សចំនួន១៣លាននាក់ថា ពួកគេត្រូវបានអនុញ្ញាតឲ្យចេញពីផ្ទះ តែនៅពេលដែលទទួលការអញ្ជើញឲ្យចូលរួមក្នុងការធ្វើតេស្តទ្រង់ទ្រាយធំថ្មី ឬសម្រាប់ការសង្គ្រោះបន្ទាន់ផ្នែកវេជ្ជសាស្រ្តប៉ុណ្ណោះ។

ពីមុន សមាជិកម្នាក់នៃគ្រួសារនីមួយៗ ត្រូវបានអនុញ្ញាតឲ្យចេញពីផ្ទះម្តង រៀងរាល់ពីរថ្ងៃដើម្បីទិញអាហារ។ ប្រជាជននៅក្នុងតំបន់មានហានិភ័យទាប នឹងត្រូវបានអនុញ្ញាតឲ្យចេញទិញសម្ភារៈសំខាន់ៗ នៅពេលការធ្វើតេស្តបញ្ចប់ ហើយប្រសិនបើលទ្ធផលរបស់ពួកគេ អវិជ្ជមាន។

ទីក្រុង Xi’an បានរាយការណ៍ករណីថ្មីចំនួន១៧៥កាលពីថ្ងៃអង្គារ ដែលជាតួលេខតិចតួចបើប្រៀបធៀបទៅនឹងទីក្រុងធំៗផ្សេងទៀតជុំវិញពិភពលោក ប៉ុន្តែវាជាការវាយប្រហារដ៏ធំមួយចំពោះប្រទេសចិន ដែលកំពុងបន្តអនុវត្តយុទ្ធសាស្រ្ត “សូន្យកូវីដ”។

ទីក្រុងនៅក្បែរៗនោះ ក៏បានកត់ត្រាករណីឆ្លងដែលទាក់ទងនឹងការផ្ទុះនេះផងដែរ ដោយទីក្រុង Yan’an កាលពីថ្ងៃអង្គារបានបិទអាជីវកម្ម និងបញ្ជាឲ្យមនុស្សរាប់សែននាក់នៅក្នុងស្រុកមួយ ត្រូវស្នាក់នៅក្នុងផ្ទះ។

វិធានការបិទខ្ទប់ដ៏តឹងរ៉ឹងបែបនេះ បានជំរុញឲ្យអ្នកក្រុង Xi’an មួយចំនួន ងាកទៅរកប្រព័ន្ធផ្សព្វផ្សាយសង្គមដើម្បីសុំជំនួយ ដោយនិយាយថាពួកគេឃ្លាន និងអំពាវនាវដល់អ្នកជិតខាងសុំការផ្គត់ផ្គង់។

មនុស្ស​ម្នាក់​បាន​សរសេរ​លើបណ្តាញ Weibo របស់​ប្រទេស​ចិនដែលស្រដៀង Facebook ​ថា “ខ្ញុំប្រហែលជា​ត្រូវ​អត់​អាហារ​ដល់​ស្លាប់ហើយ។ អត់មានអាហារទេក្នុងផ្ទះរបស់ខ្ញុំ គេមិនឲ្យខ្ញុំចេញពីផ្ទះឡើយ ខ្ញុំជិតអស់មីហើយ សូមជួយផង!”។

គួរបញ្ជាក់ថា ការផ្ទុះកូវីដនៅទីក្រុង Xi’an កំពុងត្រូវបានជំរុញដោយវីរុសបំប្លែងខ្លួន Delta ហើយត្រូវបានគេជឿថា មានទំនាក់ទំនងជាមួយអ្នកធ្វើដំណើរទៅកាន់ប្រទេសប៉ាគីស្ថានកាលពីសប្តាហ៍មុន។

ទីក្រុងនេះបានស្ថិតនៅក្នុងការបិទខ្ទប់ ចាប់តាំងពីថ្ងៃព្រហស្បតិ៍មុនមក៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ទើបរកឃើញ Omicron លើកដំបូង ចិន ដាក់មនុស្សរាប់សែននាក់ធ្វើចត្តាឡីស័ក