ព័ត៌មានអន្ដរជាតិ

តុលាការកាណាដាផ្តល់ប្រាក់ជាង៨៣លានដុល្លារដល់គ្រួសាររងគ្រោះធ្លាក់យន្តហោះនៅអ៉ីរ៉ង់

បានផុស

៣ years មុន

នៅ

ថ្ងៃអង្គារ ៤ មករា ២០២២

ដោយ

តុលាការនៅទីក្រុង Ontario ប្រទេសកាណាដាបានផ្តល់ប្រាក់សំណង៨៣.៩៤លានដុល្លារអាមេរិក បូករួមទាំងប្រាក់ការដល់ក្រុមគ្រួសារនៃជនរងគ្រោះ៦នាក់ដែលបានស្លាប់នៅពេលឆ្មាំបដិវត្តន៍អ៉ីរ៉ង់បានបាញ់ទម្លាក់យន្តហោះ Ukraine International Airlines មួយគ្រឿងនៅជិតទីក្រុងតេអេរ៉ងកាលពីពីរឆ្នាំមុន។

អ៉ីរ៉ង់បានបាញ់ទម្លាក់យន្តហោះកាលពីខែមករាឆ្នាំ២០២០។ មនុស្សទាំង១៧៦នាក់នៅលើយន្តហោះត្រូវបានសម្លាប់ ក្នុងនោះមានពលរដ្ឋកាណាដា៥៥នាក់ និងអ្នកស្នាក់នៅអចិន្ត្រៃយ៍៣០នាក់។

សមាជិកគ្រួសារទាំង៦នាក់ត្រូវបានផ្តល់សំណងដោយតុលាការទីក្រុង Ontario ដែលបានបាត់បង់ប្តីប្រពន្ធ បងប្អូន កូន ក្មួយ នៅលើយន្តហោះជើងហោះហើរ Flight 752។ នេះបើយោងតាមលោក Mark Arnold មេធាវីរបស់ពួកគេបាននិយាយក្នុងសេចក្តីប្រកាសមួយកាលពីថ្ងៃចន្ទ។ ពួកគេបានដាក់បណ្តឹងរដ្ឋប្បវេណីប្រឆាំងអ៉ីរ៉ង់ និងមន្ត្រីផ្សេងៗទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេធាវីនិយាយថា ក្រុមការងាររបស់លោកនឹងពិនិត្យមើលដើម្បីរឹបអូសយកទ្រព្យសម្បត្តិអ៉ីរ៉ង់នៅប្រទេសកាណាដា និងក្រៅប្រទេស។ លោកថា អ៉ីរ៉ង់ក៏មាននាវាដឹកប្រេងនៅប្រទេសផ្សេងៗ ហើយក្រុមការងាររបស់លោកនឹងសម្លឹងរករឹបអូសអ្វីក៏ដោយឲ្យតែបង់សំណងទៅក្រុមគ្រួសារជនរងគ្រោះបាន។

ការសម្រេចធ្វើឡើងដោយចៅក្រម Edward Belobaba របស់តុលាការក្រុង Ontario កាលពីថ្ងៃទី៣១ ខែធ្នូ និងបានប្រកាសដោយលោក Arnold នាថ្ងៃចន្ទ ទី៣ ខែមករានេះ។

ពាក្យបណ្តឹងត្រូវបានដាក់ដោយលោក Shahin Moghaddam, Mehrzad Zarei និង Ali Gorji។ តាមការផ្សាយរបស់ CBC ថា ដោយមានការភ័យខ្លាចពីការសងសឹករបស់អ៉ីរ៉ង ដើមបណ្តឹងមួយចំនួនបានដកខ្លួនពីការប្តឹង។

ក្រុមកោសល្យវិច្ច័យកាណាដាពិសេសមួយបានធ្វើរបាយការណ៍នៅពាក់កណ្តាលឆ្នាំ២០២១ដោយបានចោទប្រទេសអ៉ីរ៉ង់ពីអសមត្ថភាព និងខ្វះការប្រុងប្រយ័ត្នដែលបណ្តាលឲ្យយន្តហោះដឹកអ្នកដំណើរអ៊ុយក្រែនគ្រោះថ្នាក់។ អ៉ីរ៉ង់បានរិះគន់ចំពោះរបាយការណ៍នោះថាជាចេតនានយោបាយ។

របាយការណ៍បានរកឃើញថា ការបាញ់ទម្លាក់យន្តហោះ Ukrainian International Airlines ជើងហោះហើរ 752 ត្រូវបានធ្វើឡើងដោយគ្មានការគិតទុកមុនទេ។ វាមិនត្រូវបានដោះស្រាយដោយមន្ត្រីអ៉ីរ៉ង់ដែលទទួលខុសត្រូវចំពោះឧបទ្ទវហេតុនេះ។

អ៉ីរ៉ងបានទទួលស្គាល់ថា ខ្លួនពិតជាបានបាញ់ទម្លាក់យន្តហោះនោះមែនបន្ទាប់ពីហោះហើរចេញពីទីក្រុងតេអេរ៉ង់ក្នុងខែមករា ឆ្នាំ២០២០ និងបានស្តីបន្ទោសជាកំហុសមហន្តរាយដោយកងកម្លាំងក្នុងការប្រុងប្រយ័ត្ននៅពេលមានការប្រឈមមុខគ្នាជាមួយសហរដ្ឋអាមេរិក៕

ប្រែសម្រួល៖ វីរបុត្រ
ប្រភព៖ theguardian