ព័ត៌មានអន្ដរជាតិ

កុំប្រហែស អាមេរិកឆ្លងកូវីដជិត១លាននាក់ក្នុង១ថ្ងៃបង្កើតកំណត់ត្រាពិភពលោក

បានផុស

៣ years មុន

នៅ

ថ្ងៃពុធ ៥ មករា ២០២២

ដោយ

សហរដ្ឋអាមេរិកបានបង្កើតកំណត់ត្រាពភពលោកថ្មីនៃករណីឆ្លងកូវីដ-១៩ក្នុងមួយថ្ងៃច្រើនបំផុតជិត១លាននាក់កាលពីថ្ងៃចន្ទដោយសារវីរុសបំប្លែងខ្លួនថ្មី Omicron កំពុងរាតត្បាតខ្លាំង។

បើយោងតាមទិន្នន័យរបស់ទីភ្នាក់ងារសារព័ត៌មាន Reuters ដែលចំនួនជាប់កំណត់ត្រាជាសកលនេះកើនឡើងជិតពីរដងនៃចំនួនខ្ពស់បំផុតរបស់ប្រទេសគឺ ៥០៥ ១០៩នាក់ក្នុងមួយថ្ងៃកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការវិភាគរបស់ Reuters បង្ហាញថា ចំនួនអ្នកជំងឺឆ្លងកូវីដចូលមន្ទីរបានកើនឡើងជិត៥០%នៅក្នុងសប្តាហ៍មុន ហើយឥឡូវនេះលើស១សែននាក់ហើយ។ វាជាលើកដំបូងដែលចំនួនកើនឡើងឈានដល់កម្រិតខ្ពស់បំផុតចាប់តាំងពីការកើនឡើងក្នុងរដូវត្រជាក់មួយឆ្នាំកន្លងទៅ។

ជារួម អាមេរិកមានករណីឆ្លងប្រចាំថ្ងៃជាមធ្យម ៤៨៦ ០០០នាក់កាលពីសប្តាហ៍កន្លងទៅដែលអត្រានេះកើនឡើងទ្វេងក្នុងរយៈពេល៧ថ្ងៃ និងលើសពីប្រទេសដទៃទូទាំងពិភពលោក។ កាលពីថ្ងៃចន្ទ ទី៣ ខែមករា អាមេរិកមានករណីឆ្លងកូវីដថ្មីចំនួន ៩៧៨ ៨៥៦ នាក់ រាប់បញ្ចូលទាំងករណីខ្លះពីថ្ងៃសៅរ៍ និងអាទិត្យ ហើយមានរដ្ឋជាច្រើនទៀតដែលមិនបានផ្ញើរបាយការណ៍ដើម្បីបូកសរុបចំនួន។

ចំនួនជាមធ្យមនៃការស្លាប់ដោយកូវីដនៅអាមេរិកនៅតែខ្ពស់ជាប្រចាំគិតចាប់ពីខែធ្នូ ឆ្នាំ២០២១ឈានចូលខែមករា ឆ្នាំ២០២២ពោលគឺប្រហែលជា១៣០០នាក់ជារៀងរាល់ថ្ងៃ។ ទោះជាយ៉ាងណា ចំនួនស្លាប់នៅមានកម្រិតទាបឆ្ងាយ បើប្រៀបធៀបជាមួយចំនួនអ្នកឆ្លងថ្មី និងកំណើនអ្នកជំងឺចូលមន្ទីរពេទ្យ។

វីរុសបំប្លែងខ្លួនថ្មី Omicron ទំនងជាកត្តាចម្បងនៃការឆ្លង និងឆ្លងងាយស្រួលរហ័សជាងវីរុសបំប្លែងខ្លួនមុនៗ។ មជ្ឈមណ្ឌលគ្រប់គ្រង និងបង្ការជំងឺឆ្លង (CDC) អាមេរិកបាននិយាយនៅថ្ងៃអង្គារ៍ម្សិលមិញថា តាមការប៉ាន់ស្មាន ករណីឆ្លងដោយវីរុសថ្មីនេះប្រមាណ ៩៥.៤%នៃករណីឆ្លងថ្មីទាំងអស់នៅសហរដ្ឋអាមេរិកចាប់ពីថ្ងៃទី១ ខែមករា មក៕

ប្រែសម្រួល៖ វីរបុត្រ
ប្រភព៖ reuters