សម្ព័ន្ធភាពដឹកនាំដោយរុស្ស៊ី បញ្ជូនកងកម្លាំងទៅ កាហ្សាក់ស្ថាន ដែលកំពុងវឹកវរ

សម្ព័ន្ធភាពយោធាដឹកនាំដោយរុស្ស៊ីបាននិយាយថា ខ្លួននឹងបញ្ជូនកងកម្លាំងរក្សាសន្តិភាពទៅប្រទេសកាហ្សាក់ស្ថាន ខណៈការតវ៉ាទ្រង់ទ្រាយធំបានធ្វើឲ្យអតីតប្រទេសសូវៀតមួយនេះ ធ្លាក់ចូលទៅក្នុងភាពវឹកវរគ្រប់គ្រងលែងបាន។

ធ្លាប់តែជាប់ឈ្មោះជាប្រទេសមួយដែលមានស្ថិរភាពបំផុតក្នុងចំណោមអតីតសាធារណរដ្ឋសូវៀតនៅអាស៊ីកណ្តាល កាហ្សាក់ស្ថានកំពុងប្រឈមមុខនឹងវិបត្តិដ៏ធំបំផុតក្នុងរយៈពេលជាច្រើនទសវត្សរ៍ បន្ទាប់ពីក្រុមបាតុករខឹងសម្បាចំពោះការកើនឡើងតម្លៃប្រេងឥន្ធនៈ បានសម្រុកចូលអគាររដ្ឋាភិបាល។

ប្រធានាធិបតីកាហ្សាក់ស្ថាន លោក Kassym-Jomart Tokayev បាននិយាយនៅក្នុងសុន្ទរកថាទៅកាន់ជនរួមជាតិនៅព្រឹកថ្ងៃព្រហស្បតិ៍ទី៦ខែមករានេះថា លោកសូមអំពាវនាវដល់អង្គការសន្ធិសញ្ញាសន្តិសុខសមូហភាព (CSTO) ដឹកនាំដោយរុស្ស៊ី ដែលរួមមានអតីតរដ្ឋចំនួន៥ផ្សេងទៀតរបស់សហភាពសូវៀត ឲ្យមកប្រយុទ្ធប្រឆាំងនឹងអ្វីដែលលោកហៅថា “ក្រុមភេរវករ” ដែលបានទទួលការបណ្តុះបណ្តាលយ៉ាងស្ទាត់ជំនាញនៅបរទេស។

លោក Tokaev និយាយថា “ភេរវករ កំពុងរឹបអូសអគារ ហេដ្ឋារចនាសម្ព័ន្ធ និង ទីតាំងដែលផ្ទុកអាវុធធុនតូច។ ពួកគេក៏បានបញ្ជាយន្តហោះចំនួនប្រាំគ្រឿង នៅឯអាកាសយានដ្ឋានក្នុងទីក្រុងដ៏ធំបំផុត Almaty ផងដែរហើយ កងកម្លាំងអាកាសរបស់ប្រទេសកាហ្សាក់ស្ថាន បានចូលរួមក្នុងសមរភូមិដ៏តានតឹង នៅជិតទីក្រុងនេះ”។

ស្របពេលជាមួយគ្នានោះ ប្រធាន CSTO គឺនាយករដ្ឋមន្ត្រីអាមេនីលោក Nikol Pashinyan បាននិយាយនៅលើ Facebook ថា សម្ព័ន្ធភាពនេះនឹងបញ្ជូន “កងកម្លាំងរក្សាសន្តិភាពសមូហភាព សម្រាប់រយៈពេលកំណត់មួយ ដើម្បីធ្វើឲ្យមានស្ថិរភាពនិងស្តារស្ថានភាពនៅក្នុងប្រទេសនេះឲ្យមកធម្មតាឡើងវិញ”។

គួរបញ្ជាក់ថា ការតវ៉ាបានរីករាលដាលពាសពេញប្រទេសដែលមានប្រជាជនចំនួន១៩លាននាក់មួយនេះ ដោយសារតែកំហឹងជុំវិញការដំឡើងថ្លៃឧស្ម័នរាវ (LPG) ដែលត្រូវបានគេប្រើយ៉ាងទូលំទូលាយដើម្បីចាក់រថយន្ត នៅភាគខាងលិចនៃប្រទេស។

មនុស្សរាប់ពាន់នាក់បានចេញតវ៉ាតាមដងផ្លូវក្នុងទីក្រុង Almaty និងខេត្ត Mangystau ភាគខាងលិច ដោយនិយាយថា ការកើនឡើងតម្លៃនេះគឺអយុត្តិធម៌៕

ប្រែសម្រួល៖ Vann Vann

ប្រភព៖​ CNA

ចុចអាន៖ កាហ្សាក់ស្ថាន ក្លាយជាប្រទេសកំពូលទាំង ៥ លើពិភពលោកផលិតវ៉ាក់សាំងកូវីដ និងត្រៀមចាក់ដល់ពលរដ្ឋសប្ដាហ៍ក្រោយ